Sjå Toppidrettsveka på NRK1 frå 1945
Heidi Weng hadde ein av sine aller beste sesongar i fjor og klarte endeleg å klatre heilt øvst på pallen i eit verdscuprenn. Likevel sleit ho med sjølvtilliten, følte ikkje ho gjekk bra på ski og fortalde at ho ikkje hadde heilt trua på det ho dreiv med.
I sommar har det gått opp eit lys for 25-åringen.
Knuste alle i Toppidrettsveka
– Eg føler eg meistrar ting litt betre enn det eg har gjort før. Nå har eg funne ut av ting på teknikken, så nå det går litt lettare i letterreng. Det er veldig mykje betre enn det det har vore før, fortel Weng.
– Har du betre sjølvtillit på det du gjer nå?
– Ja, eigentleg. Følelsen er mykje bedre teknisk, men så kjem vinteren så er det kanskje ikkje like bra likevel, seier Weng og flirer.
På dagens fyrste etappe av Toppidrettsveka var det iallfall ikkje vanskeleg å sjå at jenta frå Enebakk har trent godt i sommar. Weng vann med over to minutt ned til dei andre jentene og fekk ingen konkurranse.
SUVEREN: Heidi Weng gjekk tidleg ifrå feltet på den 24 kilometer lange fellesstarten frå Aure til Brekka. Ho vann framfor Emilie Kristoffersen og Ilaria Debertolis.
Foto: Claes-Tommy Herland/Norges Skiforbund / NTB scanpix– Vil ikkje tru på oss
Landslagstrenar Roar Hjelmeset har trent Weng frå ho var på juniorlandslaget og meiner han har sett stor forskjell i sommar.
– Heidi har blitt 25 år nå og alle år som ein blir eldre, fører det positivt med seg. Ho ser sterkare ut og ho går betre på ski enn det ho har gjort tidlegare. Ho har teke eit lite steg frå det me har sett tidlegare på sommaren, meiner Hjelmeset.
Sjølvtilliten er noko både lagvenninene og trenarapparatet har jobba for at skal bli betre.
– Me jobbar mykje med det. Det er ikkje alltid det hjelper sjølv om me seier til ho at ho er ein god skiløpar og gjer det bra på trening, det er ikkje alltid ho vil tru på oss, seier Hjelmeset.
I tillegg til betre sjølvtillit, har Weng også trent langt meir i vår og sommar enn tidlegare år. Nå nærmar ho seg mengdene til Johaug, Bjørgen og Østberg, som ho har vore langt unna før.
JAKTAR JOHAUG: Under Lysebotn Opp klarte ikkje Heidi Weng og fylgje Therese Johaug, men ho føler ikkje at Johaug har tatt større steg enn ho så langt i oppkøyringa.
Foto: Johansen, Carina / NTB Scanpix– Eg har trent meir, hatt betre kvalitet på ting og sett litt om eg toler så mykje mengde. Håpet er at eg kan ta enda eit større steg til vinteren enn i fjor.
– Er det mogleg å slå Johaug meir til vinteren?
– Ja, me får håpe det. Får jo håpe at ho ikkje vinn alt så folk synest det blir kjedeleg, smiler Weng.
