NRK Meny
Normal

Warholm: – No ligg eg veldig godt an

Etter ein glimrande første dag av tikampen i U20-VM i USA har Karsten Warholm ein pallplass i sikte.

Karsten Warholm er ikkje veldig overraska etter dei gode resultat på dag éin av U20-VM i Oregon. Likevel var det over det venta. No trur han på ny VM-medalje.

Karsten Warholm var godt fornøgd etter å ha fullført halve tikampen i U20-VM i Oregon. FOTO: Norges Friidrettsforbund/Charlotte Svensen.

Karsten Warholm

Her passerer Karsten Warholm målstreken på 100 meter til tida 10.55.

Foto: Steve DYKES / Afp

Før dei fem siste øvingane, 110 meter hekk, diskos, stav, spyd og 1500 meter, ligg Warholm på tredjeplass i tikampen. Han står med 4238 poeng etter dei fem første øvingane.

Med berre 91 poeng opp til leiande Cedric Dubler frå Australia, og 32 poeng ned til tsjekkiske Jirí Sýkora på femteplass, står alt på spel.

– Verste delen unnagjort

No er 18-åringen frå Ulsteinvik på Sunnmøre svært klar for dag to. Den gode opninga seier han har gjeve «ein godfølelse».

– Det lovar veldig bra for morgondagen. No er første halvdel gjort, kanskje den verste delen psykisk sett. Og no ligg eg veldig godt an, så eg ser fram til i morgon, seier Warholm.

U20-VM går i Eugene, Oregon i USA – som ligg ni timar bak Noreg. Når Warholm skal i elden igjen på dag to om morgonen i USA, har det allereie blitt kveld i Noreg.

Saka held fram under videoen.

Karsten Warholm sprang inn til tida 10.55 på 100 meter, ny personleg rekord med 31 hundredelar, under første øving i U20-VM i Eugene, Oregon i USA. FOTO: Norges Friidrettsforbund/Charlotte Svensen.

Karsten Warholm sprang inn til tida 10.55 på 100 meter under første øving i tikampen i U20-VM. FOTO: Norges Friidrettsforbund.

Trivst med favorittstempel

Allereie før VM hadde nordmannen, som vann åttekampen i U18-VM i fjor, var han medaljefavoritt.

Med glimrande 10.55 på 100 meter, personleg rekord i lengde og bestetid på 400-meteren, blei ikkje favorittstempelet mindre.

Det presset lever Warholm fint med.

– Det kjennest veldig bra. Det inneber eit visst press, men det synest eg er litt gøy å ha. No får vi sjå kor godt eg kan takle det i morgon, seier han.

Karsten Warholm

Warholm er ikkje svært overraska etter fleire personlege rekordar, men tida på 100 meter var overraskande.

Foto: Steve DYKES / Afp

Ikkje overraska

Han tok ny personleg rekord på hundremeter med 31 hundredelar tysdag i USA. Å ta personlege rekordar er derimot ikkje overraskande.

– Ein har toppa forma til dette, så eg blir ikkje veldig overraska. Men når eg persar så mykje som eg har gjort, så er det sjølvsagt over all forventning. Og det er veldig gøy, slår Warholm fast.

No augnar han ein pallplass.

– Det er sjølvsagt draumen, fortel 18-åringen.

– Men det er framleis fem øvingar igjen. Eg skal stå på så godt eg kan på dei, så får vi sjå kva sluttresultatet blir, avsluttar Warholm.

NRK vil følgje siste del av tikampen fortløpande.

Siste nytt

Sendeplan

Kl. Program Kanal
VM-kveld
VM-kveld