– Eg kjenner meg ganske mykje igjen i korleis Karsten var da han var like gammal som meg.
Henriette Jæger gliser når ho får høyre at Karsten Warholm trur ho kan bli «enormt god».
16-åringen frå Aremark i Indre Østfold er den «alle» pratar om i friidretts-Noreg om dagen. I senior-NM knuste ho alle og sprang inn til gull både 60 og 200 meter.
Vil satse mangekamp
Akkurat som den doble verdsmeisteren på 400 meter hekk gjorde på same alder, satsar Jæger på mangekamp.
Sjølv om mange rundt ho meiner ho burde spesialisere seg.
– Det er mange som kjem med tilbod og seier at eg burde satse sprint. Men eg vil halde fram med mangekamp. Det er det som har gjort meg rask, så kvifor ikkje fortsette?
Karsten Warholm seier han blir stolt av å høyre at Henriette Jæger samanliknar seg sjølv med han.
Foto: Svein Ove Ekornesvåg / Svein Ove EkornesvågWarholm har sjølv også fått med seg dei sterke prestasjonane til ungjenta.
– Ho er jo heilt rå. Fyrst og fremst så beundrar eg innstillinga hennar, måten ho angrip løpa på er rå. Du ser at ho har veldig lyst til å vinne og springe fort. Eg elskar ei slik innstilling, og eg trur at det kan ta deg veldig langt, seier den doble verdsmeisteren på 400 meter hekk.
Som synest det er stort at Jæger samanliknar seg med han.
– Eg blir alltid like varm om hjartet når folk blir inspirert av det eg driv med. Da kan det plutseleg gå bra med ho da, seier sunnmøringen og ler.
– Openbert eit multitalent
Warholm var mangekjempar heilt til han var 20 år. Sjølv da han var i semifinalen i OL i Rio meinte Warholm at 400 meter hekk berre var eit sidesprang.
Slik burde Jæger også prioritere, meiner NRKs friidrettsekspert Vebjørn Rodal.
Vebjørn Rodal meiner Henriette Jæger er det mest spennande friidrettsnamnet under 20 år.
Foto: Lise Åserud / NTB scanpix– Ho er openbert eit multitalent. Jo seinare ho spesialiserer seg, desse betre føresetnadar har ho får å velje rett øving. Kanskje kan ho også bli den mangekjemparen me treng på topp internasjonalt nivå, seier Rodal.
16-åringen er også heldig med genane med to foreldre med bakgrunn frå kastøvingar i friidrett.
Rodal trur ein overgang til 400 meter hekk om nokre år kan vere perfekt også for Jæger.
16-åringen går på vidaregåande i Fredrikstad, men trenar mykje heime i Aremark der mor Unn Merete Jæger er trenar.
Foto: Vibeke Undhjem / NRK– Mangekjemparar er solid trent og har god koordinasjon. Da er 400 meter hekk perfekt etter kvart. Det kan absolutt vere ei kvinneleg Warholm me ser i emning, seier Rodal.
Sjølv kjenner ikkje stortalentet på noko press ennå.
– Sjølvsagt har det auka litt etter NM. Men sidan eg er så ung, føler eg at folk tenkjer at dei ikkje bør sette så mykje press på meg. Eg har ein lang veg å gå ennå, seier Jæger.
