Det var søndag det amerikanske tv-programmet 60 Minutes sende opptak av samtaler mellom varslar Vitalij Stepanov og dåverande direktør for dopinglaboratoriet i Moskva, Grigory Rodtsjenkov.
Der skal det ha gått fram at fleire russiske utøvarar var dopa i Sotsji-OL, inkludert fire gullvinnarar som skal ha brukt steroid. Russland tok 13 gull i OL på heimebane.
– Vi vil gå i gang med å granske desse påstandane med det same, seier Reedie.
Ifølgje opplysningane i CBS-programmet hadde russiske tryggingstenesta FSB infiltrert antidopingprogrammet under leikane. Mellom anna skal fleire FSB-agentar ha jobba som dopingkontrollørar under OL.
– Vi har enno ikkje kunna stadfeste dette. Men vi vil no innleie gransking, og det straks, skriv WADA i ei pressemelding.
WADA ønskjer derfor også tilgang til opptaket med Rodtsjenkov, som CBS sende i programmet.
– Det er ingen tvil om at Stepanovs har gitt oss viktig informasjon som har vore heilt avgjerande for at kommisjonen som skal granske russisk idrett, har blitt oppretta, seier Reedie i pressemeldinga.
– Når han no kjem med nye opplysningar, gir det derfor god grunn til uro, seier han.
Styret i WADA skal samlast i Montreal seinare denne veka, og spørsmål knytt til russisk doping blir ei hovudsak på møtet.
Det internasjonale friidrettsforbundet suspenderte Russland i fjor haust, og skal i juni ta stilling til om landet har gjort nok framsteg i dopingkampen til at suspensjonen blir oppheva før OL i Rio i august.
