Slakta lagkameratane etter tap – no legg Thorstvedt seg flat

– Vi leverer ein ekstremt svak kamp. Det verka som vi undervurderte New Zealand alvorleg, og blir sjokkerte når vi ser kva dei møter oss med. Vi maktar ikkje å kome tilbake når dei scorer på det langskotet sitt, og fell saman, sa Thorstvedt etter kampen.

– Skal det vere mogeleg å undervurderer New Zealand i eit VM?

– Nei, ikkje i det heile tatt. Vi leverer dårleg mot eit godt lag, heldt Thorstvedt fram.

Thorstvedt, som ikkje fekk starte kampen, var også skuffa over å måtte sjå store deler av tapet frå sidelinja.

No har Torstvedt teke til Twitter for å leggje seg flat.

Gråtkvalt kaptein: – Eg er j.... lei meg

Thorstvedt var ikkje den einaste som var langt nede etter 2-0-tapet, som gjer at vidare avansement i U20-VM heng i ein tynn tråd.

– Det er berre å beklage. Eg er jævla lei meg, seier ein gråtkvalt kaptein Leo Østigard til NRK etter kampen.

– Det er veldig tøft for gutta. Dei har det tungt, så no gjeld det å ta vare på dei, seier trenar Pål Arne «Paco» Johansen.

Han meiner Noreg var nær ved å score fleire gonger og at det kunne gitt ei heilt annan utvikling i kampen. Og at det ikkje vart norske mål er det som skuffar trenaren mest. Og han nektar å gi opp håpet om å ta seg vidare til sluttspelet.

– Så lenge det er ein sjanse er det håp. Skal gjere alt for at vi klarar å ta den.

Hugo Vetlesen var optimistisk framfor siste kamp.

– I kveld skal vi vere forbanna over at vi ikkje gjorde ein god nok jobb. Men i morgon skal vi sjå framover mot neste kamp. Vi skal nok legge ein god plan mot Honduras, så skal nok dette gå fint.

Kjempetreff og sjølvmål

Noreg var lenge det beste laget, men 71 minutt ut i kampen sørgar Gianni Stensness for at Noreg sitt håp om å ta seg vidare til sluttspelet ser veldig dårleg ut.

Eit sjølvmål av John Kitolano gjorde kampen enda meir heilsvart for det norske laget.

Stensness får ballen på minst 25 meter etter norsk klarering og smeller til. Han får eit kjempetreff og ballen susar inn i Faye Lunds høgre hjørne.

Noreg står dermed med null poeng og to tap så langt i U20-VM. Torsdag møter laget Honduras som er rekna som det dårlegaste laget i gruppa.

Vinn Noreg den kampen blir dei nummer tre i gruppa, men med berre tre poeng. Det kan fort bli for lite om å bli blant dei fire beste gruppetrearane.

Svake norske avslutningar

49 minutt ut i kampen var Noreg nær ved å ta leiinga. Erling Braut Haaland får ballen framfor keeper, men blir takla like før han skal setje ballen i mål.

Ti minutt seinare går Haaland i duell med keeper, men får ikkje noko meir ut av det.

Første omgang enda mållaust. Noreg kom best i gang, men New Zealand kom etter kvart meir med i kampen. Noreg hadde den største sjansen tre minutt før pause, da Erling Braut Haaland gjekk aleine med keeper, men ballen hamna utanfor.

New Zealand imponerte med heile 5–0 over Honduras i første kamp. I og med at Noreg tapte 1–3 mot Ungarn, var siger i dag svært viktig for å få eit avansement.

– Vi skal gå i strupen på dei frå start, sa trenar Pål Arne «Paco» Johansen til NRK like før start.

Uruguay har tidlegare i kveld slått Honduras 2-0, og både dei og New Zealand er sikre på å gå vidare i turneringa.