Ho har gull i utfor, gull i superkombinasjonen og sølv i super-G, men alpintstjerna Tina Maze vil ikkje stoppe før ho har fem medaljar.
– Eg er over halvvegs. Tre er unnagjort. No manglar eg bare to medaljar, seier Maze.
I går slo ho hjul av glede etter å ha vunne superkombinasjonen 0,22 sekund framfor Nicole Hosp.
Etter triumfen kom det klart fram kven som er hennar store helt.
– Lasse Kjus, han er min store inspirasjon, seier Maze til NRK.
– Det blir ikkje enkelt
No er ho på god veg til å tangere nordmannens eventyrlege rekord på fem medaljar under VM i Vail i 1999.
Ikkje før eller sidan har nokon tatt fleire medaljar i eitt og same alpin-VM.
– Eg håpar det går, men det blir ikkje enkelt, seier Maze i eit intervju med TV-kanalen NBC.
(Artikkelen held fram under videoen)
På taket av Red Tail Arena stod Maze-helten Lasse Kjus og følgde VM-dronninga i superkombinasjonen.
Han har trua på 31-åringen, som tok to OL-gull i Sotsji i fjor.
– Ho er den einaste i dette VM som kan ta fem medaljar, seier Kjus.
Fire gangar Hahnenkamm-vinnar Didier Cuche tar av seg hatten og spår meir gull og glitter.
– Ho kan definitivt ta fem medaljar. I slalåmdelen var ho sterk, hadde bra rytme og takla mykje press. I storslalåm har ho vore sterk heile vinteren, seier Cuche, som er skråsikker på at Maze står på toppen under storslalåmrennet torsdag.
- Les også: Derfor er han vraka
Slalåm-nerver
I slalåm er ikkje sveitsaren like sikker på om det går.
– Ho har aldri tatt VM-medalje i slalåm. Det er i denne konkurransen nervene kan komme.
Men med Mazes ekstreme sjølvtillit kan det gå, meiner Cuche.
– Ho flyr over snøen. Tina Maze er i fyr og flamme.
Også Ragnhild Mowinckel, som blei nummer ni i kombinasjonen, er imponert.
– Det er heilt sjukt. For ein komplett skiløpar ho er. Ho er ei maskin. Det er så imponerande å sjå på når ho vinn renn etter renn, seier Mowinckel.
