Vil innskrenke sponsorreglane
18 av dei 20 klubbane i Premier League vil ha forbod mot sponsorar som har koblingar med klubbeigarane, melder Sky Sports.
Bakgrunnen er dei omstridde nye arabiske eigarane av Newcastle United, og frykta for at dei skal teikne sponsorkontrakter med saudiarabiske statseigde selskap.
Forbodet er i utgangspunktet mellombels og varer ein månad. Då er det meininga at eit permanent forbod skal vere på plass.
18 av dei 20 klubbane i Premier League røysta for forbodet på det ekstraordinære medlemsmøtet måndag. Newcastle røysta imot, og Manchester City avsto frå å røyste.
Ifølgje The Guardian meiner Newcastles advokatar at vedtaket er ulovleg. Klubben har ikkje kommentert resultatet av røystinga.
Det saudiarabiske investeringsselskapet PIF har kjøpt 80 prosent av Newcastle. Dei andre klubbane fryktar at eigarane vil kunne omgå dei økonomiske reglane i fotballen, Financial Fair Play.
