- Følg kampen:
– Nei, eg har ikkje merka noko spesielt på gutane. Men det kan vere slik. I så fall håper eg det er noko positivt, noko som inspirerer, seier Jan Jönsson.
AaFK-trenaren har akkurat runda av siste trening før årets sjette serierunde. Motstandar er Vålerenga, der tidlegare AaFK-trenar Kjetil Rekdal tok over roret i vinter.
- Les også:
- Les også:
Var sjølv VIF-aktuell
Svensken, som har teke Stabæk til seriegull, før han gjekk til Rosenborg, var sjølv Vålerenga-aktuell.
– Kampen er kanskje spesiell for deg òg, sidan du var aktuell for trenarjobben i VIF i vinter?
– Det tenkjer eg ikkje mykje på. Vi har ein spennande match framover oss, på Ullevaal, og det skal inspirere litt ekstra, seier Jönsson.
Elendig seriestatistikk på Ullevaal
Og kanskje treng AaFK litt ekstra inspirasjon, trass i serieleiinga. Dei oransje og blå har nemleg aldri vunne ein seriekamp mot Vålerenga på Ullevaal. Seks VIF-sigrar og to uavgjortkampar er fasit over åtte møter.
- Sjå:
Triumfar på Ullevaal er derimot ikkje ukjent for AaFK, med to cupgull (2009 og 2011).
– Vi får tenkje litt cup. Det er viktig at ein har positive vibbar derfrå. I tillegg har vi ein god seriestart, utan å vere briljante, å ta med oss inn i kampen, nikkar Jönsson.
Jönsson sin statistikk mot Kjetil Rekdal er derimot god. Ni kampar, berre eitt tap.
– Kan du utnytte det, trur du?
– Det har eg ikkje tenkt noko på, men eg får prøve på det då, smiler AaFK-trenaren.
Saka held fram under bildet.
– Ikkje nokon relasjon til AaFK
På Valle Hovin, i Oslo, har Kjetil Rekdal forsøkt å drille inn sin førsteellevar før møtet med AaFK.
- Les også:
Han er klar på at kampen mot gamleklubben blir litt spesiell.
– Når ein har trena eit lag i over fire år og skal møte dei igjen, så er det litt rart. Samstundes er dette ein del av fotballen sin kvardag, og eg har ikkje nokon relasjon til AaFK i det heile lenger, fortel Rekdal til NRK.
Det er eit tilbakelagt kapittel, seier han. All energi og sympati ligg i Vålerenga.
– Er det litt rart at forholdet har blitt heilt borte, så sentral som du har vore i klubben?
– Eg trur det er slik det er for oss trenarar, at du er ein stad og gjer ein jobb, med følelsar og energi der og då. Når ein reiser blir det litt kutta tvert av.
– Kan heller prate om kva som har kome
AaFK-kaptein Jonatan Tollås Nation har tidlegare vore ute i media, både i forsvar for Rekdal og for å lett kritisere han.
– Eg ser han Kjetil seier i avisa at enkelte er høge på pæra, men det trur eg ikkje nokon inne i garderoben er, seier Tollås Nation.
Han meiner spelargruppa har beina godt planta på jorda, trass i ein fenomenal seriestart og tabelltopp.
Kampen mot Vålerenga vil han ikkje legge for mykje i.
– Vi møter dei ute på banen, kven som står på sidelinja legg vi ikkje merke til. Men det blir kjekt å sjå kva han Kjetil får utretta med klubben og laget.
– Kva forsvann ut av dørene på Color Line Stadion med Rekdal, og kva har de fått med Jönsson?
– Nei, no har de fått høyre så mykje om kva som forsvann. Vi kan heller prate om kva som har kome. Det er ein flink, fotballsmart trenar, som er svolten på å oppnå resultat. Vi treng ikkje prate om det som var, seier Tollås Nation til NRK.