Entusiasmen bak det nye tiltaket i pavens eigen stat er det ikkje noko i vegen med. – Laget skal bli sterkt nok til å slå kven som helst, seier Fader Theodore Masacarenhas – ein indisk prest med bakgrunn som "spin bowler" på nokså høgt nivå.
Og dei har også mål som ligg på eit mykje høgare plan enn cricket-kampar i seg sjølv: Å byggje bru over til andre religionar og trusretningar.
Første "interreligiøse kamp" skal etter planen gå av stabelen i september neste år. Vatikan-klubben har utfordra den anglikanske kyrkja i England til ein kamp på sjølvaste Lord's.
Lord's Cricket Club i London er cricket-sportens storstove og mest kjende arena.
– Velkomne til England som brør
Det utspelet har dei fått positiv tilbakemelding på. Biskopen av Shrewsbury – ein velkjend cricket-tilhengar – tek imot utfordringa entusiastisk.
– Vi ønskjer dei velkomne til England som brør, seier biskop Mark Rylands.
– Eg er overtydd om at det til og med kan utvikle seg til ein årleg kamp i økumenisk ånd. Eg håpar også at vi kan halde kontroversane i kampen nede på eit minimum slik at vi ikkje treng nøytrale dommarar, seier han.
Ordet "økumenisk" tyder auka forståing og samarbeid mellom ulike kristne kyrkjer.
Vatikanet har inga cricket-bane. Dei blir henvist til ei kampbane utanfor Roma, og ei treningsbane nærmare sentrum av byen.
"Revansjekamp" 500 år etterpå
Det kan bli litt av ein revansjekamp, nesten 500 år etter Henrik 8. og spliden mellom katolisismen og protestantismen. Men hakket mindre blodig denne gongen.
Jobben med å stifte klubben har pågått i eit års tid. Det var Australias ambassadør John McCarthy som tok initiativet.
– Dette er sports-diplomati, seier han.
Cricketklubben i Vatikanet vart høgtideleg stifta tysdag. På stiftingsmøtet var steminga høg, og det heile vart markert med te og agurksmørbrød.
Rundt 300 geistlege og studentar i Vatikanstaten midt i Roma spelar cricket i større eller mindre grad. Det er frå desse laget i første omgang skal hente startellevaren.
St. Peter's Cricket Club
Namnet? St. Peter's Cricket Club, sjølvsagt. Og dei skal spele i dei gulkvite fargane til Vatikanet.
– Vi lærer mykje av sport, seier Antony Shehan Fenando frå Sri Lanka. Han er student ved Maria Mater Ecclesiae college i den vesle Vatikanstaten.
– Vi lærer å takle både sigrar og tap, akkurat som i livet elles. Livet som prest blir ikkje lett, det veit vi, seier Antony. Han har studert i Italia i tre år. For han har det vore ein draum å skape eit cricketlag i landet der det er fotballen som rår.
Entusiasmen i den nystarta klubben er det ingenting i vegen med. Klubbsekretæren er Fader Eamonn O'Higgins med irsk bakgrunn. Han har store planer for framtida.
Vil byggje bru mellom religionane
Han ser for seg kampar mot andre religionar og trusretningar.
– Vi gjer ikkje dette berre for å spele kampar. Vi vil prøve å byggje vennskap med både truande og ikkje-truande, seier Fader O'Higgins.
Cricket er enormt populært i store land som India, Pakistan og Sri Lanka, og St. Peter's Cricket Club planlegg kampar mot muslimske og hinduistiske skular i dei nasjonane.
Den argentinske pave Frans har personleg kjennskap til cricket frå før. Det var cricket-lag i jesuitt-colleget han ein gong var rektor for.
– Når det kjem til cricket, er alle pakistanarar fundamentalistar, seier fader Robert McCullogh, ein australsk katolsk prest som arbeider i Pakistan.
Vatikan-klubben ser også etter nonner frå dei tre landa for å stifte eit kvinnelag.
– Dette er rådets ønskje om å nå ut til periferien i verda, slik pave Frans har sagt, seier klubbpresident Melchor Sancez.