Usikker Hareide før «supermøtet» i cupen

• Les: Cupmeister mot seriemeister i tredje runde

– Eg veit éin ting og det er at eg skal på kampen, for det er lenge sidan eg har vore i Ulsteinvik, fortel Åge Hareide.

Den smilande 59-åringen med den hostande latteren er opphavleg frå Hareid, nabokommunen til Ulsteinvik – der Hødd held til.

Allereie som gutespelar gjekk han til Hødd, der karrieren skaut fart mellom 1970 og 1975. Vegen gjekk vidare til Molde for den høge og hardtkjempande forsvararen. Der blei han verande i seks sesongar.

Vidare gjekk turen til England, der Manchester City og Norwich blei stoppestad over tre sesongar. I 1984 gjekk turen tilbake til Molde der han til slutt la fotballskorne på hylla i 1987.

Ein lang trenarkarriere følgde så, der han sa takk for seg i går måndag.

• Les også: Hareide gir seg som trenar
• Les også: Åge Hareide forteller om livet som følelsesmenneske

Usikker ved straffespark

Fotballinteressa stoppar derimot ikkje, og når Hødd tek imot Molde til 3. runde-kamp på Høddvoll 29. mai blir det vanskeleg for Åge Hareide.

– Hødd er min første klubb, det er heimplassen og alt det. Men Molde har blitt ein veldig stor del av meg, eg har budd her lenger enn der. Så eg er ganske open før kampen.

– Kvar ligg følelsane dersom kampen må avgjerast på straffespark? Er det barndomsfølelsane for Hødd som slår inn då?

– Eg er svært usikker på korleis det vil bli. Eg har ikkje nokon preferanse akkurat no, så eg trur det blir rein underhaldning å få sjå kampen og kva som skjer, fortel Hareide.

Slepp unna billettkjøp

Då Hødd slo Tromsø i cupfinalen 2012 var Hareide ringside og heia klubben frå ungdomsåra fram. Seinast måndag uttalte han seg i svært positive ordelag om at han framleis trudde Molde hadde gullsjansar.

• Les også: Hareide tror Molde går fra fiaskostart til seriegull

– Eg skal på kamp, men eg er open for dei fleste resultat, seier ein hemmelegheitsfull Hareide.

På Høddvoll 29. mai blir Hareide «berre» tilskodar. Verken trenar, spelar eller noko slags stilling i verken Hødd eller Molde.

– Blir det rart å løyse billett?

– No er det slik at eg er heldig som har så mange landskampar og har fribillett til alt som er, avsluttar ein humrande Hareide.