Trur Hovland blir ein stor suksess i Tyskland

– Eg trur Even kan bli ein av støttespelarane på Nürnberg. No må han berre få nok kampar, få etablert seg, bli varm i trøya og lære seg språket - så går det nok ganske fort, seier Anders Giske.

Han har sjølv lang røynsle frå tysk toppfotball, mellom anna var han kaptein på Nürnberg i tre sesongar på 80-talet. Han følgjer framleis med på det som skjer i gamleklubben.

Og han har stor tru på sogningen som no er i klubben.

– Even har både fysikken og hurtigheiten som skal til for å hevde seg. Tyskland er midt i blinken for han. Eg er sikker på at han tek nivået ganske kjapt. Om kort tid er han ein støttespelar på laget, seier Giske.

• LES OGSÅ: Even Hovland (25) solgt til Nürnberg
• LES OGSÅ: Hovland klar for Tyskland

Kan snart vere tilbake på fellestrening

Hovland tok i sommar steget frå Molde i norsk eliteserie til Nürnberg i 2. Bundesliga. Klubben rykte sist sesong ned på nest øvste nivå i Tyskland.

Etter kort tid fekk Hovland ein skade under ein treningskamp for den nye klubben. No har han vore sett ut av spel sidan juli, då det tyske fotballmagasinet Kicker først melde om skaden.

– Det er alltid kjedeleg å bli skadd, iallfall no når eg akkurat har komme til ein ny klubb, seier Hovland.

Skaden var ei rift i eine lårmuskelen.

– No ligg eg godt framfor skjema, og eg håpar eg når som helst kan trene med resten av laget igjen, seier midtstopparen.

• LES OGSÅ: Hovland høyrde aldri frå Anzhi

Spelarane har stort press på seg

I mellomtida har lagkameratane starta sesongen for Nürnberg. Det har enda med to tap og éin siger. Fjortandeplassen er ikkje i tråd med ambisjonane om å rykkje opp.

– Ingen er nøgde med at vi ikkje har fått ein betre start enn det. Men når du ikkje klarer å score fleire mål enn motstandaren, og ikkje spelar betre enn dei, fortener du heller ikkje poeng. Vi har ikkje vore gode nok. No må vi må halde fram å jobbe, og snu dette fortast mogleg, seier Hovland.

Anders Giske var i tysk toppfotball i ein tiårsperiode, og veit det meste om presset som følgjer med å vere spelar i ein klubb som Nürnberg.

– Det er ein stor klubb. Ein tradisjonsklubb med veldig mange tilhengarar. Du blir kjent igjen på gata, for å seie det slik. Med stor interesse rundt klubben blir det stilt store krav om at dei skal vere med og kjempe i øvste divisjon. Og det er nok eit tidsspørsmål før dei er tilbake, seier han.

• LES OGSÅ: Hovland og Flo cupmeistrar - knuste Rosenborg 4-2
• LES OGSÅ: – Dei andre misunner oss så mange landslagsspelarar

(Artikkelen held fram under biletet)

Byggjer nytt lag rundt sterke stopparar

Sjølv kan Hovland stadfeste at det er stor interesse rundt laget, og at det er store forventingar til at spelarane skal prestere.

Frå sist sesong har meir enn halvparten av spelarane gått til andre lag. Ny sjefstrenar er franske Valérien Ismaël. Nürnberg byggjer no eit nytt lag med tanke på opprykk.

Blant dei viktigaste spelarane er den argentinske midtstopperen Javier Pinola. Også forsvarskollega Hovland er tiltenkt ein sentral rolle i den bakre lagdelen.

– Korleis føler du posisjonen din er i klubben?

– Eg må berre kjempe vidare. Sesongen har byrja, og dei andre har komme i gang. Så no må eg berre komme meg tilbake på treningsfeltet og kjempe om å få meg ein plass på laget. Så må eg ta sjansen når eg får han, seier Hovland sjølv.

Ifølgje tyske Bild betalte FC Nürnberg 250.000 euro for 25-åringen. Det tilsvarar om lag to millioner norske kroner.

• LES OGSÅ: Drillo ville hente Hovland

Sjå Egil «Drillo» Olsen vurdere Even Hovland på sogningen si første landslagssamling i 2011: