Marcel Hirscher: – Berre ti prosent av jobben som toppalpinist er skisport

– Berre ti prosent av jobben som toppalpinist er skiidrett. Resten er anna arbeid. Det tar enormt med energi, seier Marcel Hirscher.

Hirscher er alpinkongen som har vunne verdscupen dei fire siste sesongane – fleire av dei i tett kamp mot Aksel Lund Svindal. Det har ingen andre klart. I ein samtale med NRK fortel 26-åringen at han er usikker på kor lenge han har energi til å halde fram.

– Eg er usikker på kor lenge eg eller laget rundt meg har energien som skal til for å drive på toppnivå, seier Hirscher.

– Derfor er det ikkje sikkert at eg held på meir enn to-tre år til, seier han.

– Betyr det at du kan kome til å gi deg etter VM i St. Moritz i 2017?

– Nei, eg vil ha med meg OL i 2018, kanskje også VM i 2019, seier Marcel Hirscher.

Satsar minst til Pyeongchang

– Eg vil nok halde fram til OL i Sør-Korea i 2018, kanskje også VM (i Åre i Sverige, red. anm.) i 2019. Det kunne vere eit passande tidspunkt å avslutte ein suksessfull karriere, seier Hirscher. Han fyller 30 år eit par veker etter at VM i Åre er over.

– Å vere toppalpinist inneber massevis av oppdrag med tilknytning til media og andre ting, og det er ikkje alt som er like morosamt, seier austerrikaren.

Hirscher er inne i førebuingane til sin niande sesong i verdscupen, der han skal kjempe for sin femte strake samanlagt-tittel. 30 verdscuprenn har han vunne, alle i slalåm og storslalåm. Han har fire gull og to sølv frå VM.

Manglar OL-gull

Men OL-gull har han ikkje, det går han for i Pyeongchang i 2018. Slalåm-sølvet frå Sotsji er hans einaste OL-medalje.

– Mange av dei andre toppalpinistane held på til dei er 38 eller deromkring. Kvifor vil du gi deg når du er 30?

– Eg kom tidleg inn i verdscupen og har allereie mange sesongar bak meg. Og som eg sa, det går mykje energi til å halde seg på toppen – energi som går på mykje anna enn å trene og konkurrere. Og når du er i toppen, blir det også mykje styr rundt deg, seier Hirscher.