21-åringen slo gjennom med eit brak då ho nådde French Open-semifinalen allereie i 2019.
Det siste året har ho slått spelarar som Aryna Sabalenka (verdstoar) og Darja Kasatkina (verdsåttar). I dag er ho rangert som nummer 46 i verda.
No fortel amerikanaren at ho samtidig har stått overfor noko langt tøffare.
Prioriterer mental helse
– Eg har verkeleg slite med den mentale helsa og utbrentheita mi sidan sommaren 2022. Det har blitt uuthaldeleg på tennisturneringar, skriv Anisimova i eit innlegg på Instagram.
Sommaren 2022 nådde ho kvartfinalen i Wimbledon. Det var karrierebeste i ein major på gras, ifølgje ESPN.
Sidan hausten har ho likevel slite med å attskape prestasjonane. Når ho no tek pause, har ho ikkje vunne ein kamp sidan februar.
– På dette tidspunktet prioriterer eg den mentale helsa mi, og tar ein pause for ei stund. Eg har jobba så hardt eg kan for å presse meg gjennom det. Eg vil sakne å vere der ute, og sett pris på støtta eg får.
Delte kroppshets
Før annonseringa delte tennisspelaren også ein skjermdump av kroppshets via ei Instagram-historie.
Dette kommenterte ho sjølv:
– Mengda menneske som kommenterer kroppen min kvar dag i sosiale medium … Vil aldri forstå kva hyperfikseringa handlar om, skreiv Anisimova.
21-åringen har fått enorm støtte frå både supporterar og tenniskollegaer.
Den danske tennisstjerna Holger Rune kommenterte hetsen på Twitter.
– Hat er merkeleg og gir inga meining. Kanskje viss alle blokkerte folk som skriv hat … Så vil det berre bli dei og hata deira?
Hets, truslar og hat har blitt eit stadig aukande problem også for idrettsutøvarar generelt og kvinner spesielt.
Ei undersøking frå BBC viste ei dobling av netthets mot idrettskvinner på elitenivå frå 2015 til 2020.
Samtidig viser ein studie frå Pew Research Center at kvinner i USA er omtrent tre gonger meir utsett for seksuell trakassering på nettet enn menn.
Rosar openheita
Ole-Marius Minde Johnsen er landsleiar i Mental Helse. Han meiner Anisimovas openheit kan vere til stor hjelp for andre og henne sjølv.
– Ho er eit førebilete som går føre og tør å snakke om det. Den ærlegdommen er veldig nyttig for mange. Det hjelper i seg sjølv. Kanskje fleire er opne med sine næraste, seier Johnsen til NRK.
– Ho er med på å bryte tabuet ved å vere så open. Ho er med på å normalisere det. Det er normalt å ha opp- og nedturar i livet, og då kan det hjelpe å dele, også for henne sjølv, seier Johnsen.
Samtidig påpeikar Johnsen kor belastande det er å få så mykje hets som Anisimova beskriv.
– Det har vore eit problem lenge, særleg med kroppsfokus. Det er ei stor svakheit i befolkninga at vi opptrer på denne måten. Det er total mangel på respekt. Eg håpar det blir slått kraftig ned på, seier Johnsen.