For austerrikaren Sumann hadde skote feilfritt og gjekk til siste skyting med ei leiing som skulle halde til gull. Fire blinkar gjekk rett ned, så kom bommen. Då var Tarjei Bø verdsmeister individuelt for første gong.
Då kom tårene, direkte på NRK1.
- Dette må vere lov på ein slik dag. Dersom det blir gull, då, la han til, litt usikker.
Video: Men her har han fått smilet tilbake. - Eg er nok betre til å le enn å grine
- Eg hadde stålkontroll på skytinga, og prøvde å halde jamn fart og beholde roen. I dag var eg sjefen over meg sjølv, sa verdsmeisteren.
Men det tok si tid etter at Bø hadde gått i mål før gullet var klart. For første gong var Bø individuell verdsmeister, og tok samstundes sin første verdscupsiger på 20-kilometeren.
- No går det betre. Eg datt litt i hop i stad. No er eg berre glad. Eg er nok betre på å smile enn å grine, sa Bø då gullet var heilt sikkert.
Video: Tarjei Bø går i mål
- Mitt beste løp nokonsinne
- Eg føler at det er gulløp, så er det ikkje sikkert det blir medalje likevel. Det er litt kjipt. Denne ventetida er den verste, sa Bø, som starta tidlig. - Men eg gjekk sisterunden fort, den skal folk slite med å slå, seier han.
- Dette var kjempebra, eg er fornøgd. No kan eg ikkje klage sjølv om det ikkje blir medalje. Kanskje det beste løpet mitt nokonsinne, sa Tarjei Bø til NRK etter at han hadde gått i mål, men medan mange av dei hardaste konkurrentane framleis var ute i løypa.
- Eg har fått høyrt at du ikkje er skikkeleg mannfolk før du vinn 20-kilometeren. Det har eg no, sa Bø.
Bjørndalen "back i business"
Bø såg veldig godt bommen, det nest siste skotet på tredje skyting.
- Eg tippar den sat ute til høgre, sa han, noko ekspertkommentator Ola Lunde kunne stadfeste.
Nokre få minutt etterpå kom Ole Einar Bjørndalen inn til siste skyting, med kurs for leiing framfor Bø. Så bomma han på første skotet. Der rauk gullsjansen.
Video: Bjørndalen første skyting:
Ole Einar Bjørndalen skjøt godt på 20-kilometeren, er på første skyting
Så bomma Sumann, og så var gullet i praksis sikra for Bø. Då kom tårene. - Det må vere lov å grine litt no, sa Bø direkte på NRK.
Maxim Maxov skaut feilfritt, men var ikkje i nærleiken av Bø sin fart i avslutninga. Russaren tok sølv 40 sekund bak Bø. Sumann tok bronsen.
Bø er glad på Bjørndalens vegne.
- Det var godt at han fekk det til i dag. Ole har vore mitt førebilete, og det har vore vondt å sjå at han har slite i det siste. Derfor varmar det når han får det til, seier Bø.
Svendsen sekund frå pallen
Emil Hegle Svendsen bomma to gonger på andre skyting. Det skulle vise seg å bli dyrt. Han ende på fjerdeplass, 49,7 sekund bak Bø og 4,2 sekund frå pallen.
Men han gledde seg over unnguten frå Stryn.
- Han er heilt fantastisk. Den karen imponerer meg veldig. Det er berre å ta av seg hatten og la seg inspirere, sa Svendsen.
Video: - Det vart ein bom for mykje, sa Emil Hegle Svendsen
Ole Einar Bjørndalen slo kraftig tilbake etter fiaskoen i dei første VM-konkurransane. Farten i sporet var jamn og god, og skytinga var av toppklasse. Heilt til første skotet på siste skyting. Då rauk medaljen også for Bjørndalen. Han vart nummer seks, 1.24 bak Bø.
