Hopp til innhold

Gjekk til verbalt angrep på USA-spelar: – Du uttaler namnet vårt feil

Tysdag spelar USA mot Iran i det som er ein usedvanleg kjensleladd kamp både på og utanfor banen. Den anstrengde stemninga vart tydeleg på pressemøtet måndag.

QaIqtEErtdU

ANSTRENGT: Gregg Berhalter og Tyler Adams gløymer nok ikkje pressekonferansen søndag med det første.

Foto: PATRICK T. FALLON / AFP

Den politiske situasjonen mellom Iran og USA er låg frå før.

Men den avgjerande VM-kampen mellom nasjonane tysdag har vorte endå meir tilspissa etter at det amerikanske landslaget publiserte eit bilete på sosiale medium som viser det iranske flagget utan symbolet til den islamske republikken.

Grepet, som USAs kommunikasjonssjef Neil Buethe opplyser til NRK vart gjort av solidaritet med dei iranske kvinnene, skapte raskt sterke reaksjonar.

Amerikanarane sletta seinare biletet frå Twitter og Instagram, men Irans statlege nyheitsbyrå Tasnim ber om at USA blir straffa og blir kasta ut av VM.

– Du uttaler namnet feil!

På pressekonferansen i Doha måndag, dagen før kampen skal spelast, vart NRK vitne til ein svært spesiell pressekonferanse med det amerikanske landslaget.

Fleire iranske reporterar tok ordet og stilte spørsmål om ein rekkje tema til USA-trenar Gregg Berhalter og USA-spelar Tyler Adams.

Det vart så påfallande dårleg stemning at ei rekkje amerikanske reporterar kikka på kvarandre i forundring undervegs og tidvis måtte trekkje på smilebandet.

For å illustrere korleis stemninga var:

Etter at Leeds-spelar Tyler Adams hadde vore oppteken av å understreke at dei ikkje hadde noko med bilet-stuntet å gjere, og uttalte at heile USA-laget «støttar Irans folk og Irans lag», fekk han følgjande spørsmål i retur av ein iransk reporter:

– Du seier du støttar det iranske folket, men du uttaler namnet vårt feil. Det er Iran med i, ikkje «Airan». La oss ein gong for alle gjere dette klart. For det andre, er du komfortabel med å representere ein nasjon som har så mykje diskriminering mot svarte menneske?

– Diskriminering overalt

Spørsmålet er truleg relatert til at Iran-trenar Carlos Queiroz tidlegare i VM vart spurt om han var komfortabel med å representere eit regime som undertrykkjer kvinners rettar.

Men Tyler Adams bevarte roa.

– Eg beklagar for den galne uttalen av landet ditt. Når det er sagt, det er diskriminering overalt ein dreg. Det eg har lært av å leve i utlandet dei siste åra, når det gjeld å passe inn i ulike kulturar, gjer USA framsteg kvar einaste dag. Utdanning er viktig, slik du nettopp utdanna meg om uttalen av landet ditt, og det er ein prosess. Og det viktigaste er at ein ser framsteg, svarte Adams.

– Alt vi kan gjere er å beklage

USA-sjefen vart fleire gonger beden om å kommentere det mykje omtalte biletet av Irans flagg.

– Eg vil ikkje at det skal verke som eg ikkje bryr meg, men gutane har jobba utruleg hardt dei siste fire åra, vi har 72 timar mellom England- og Iran-kampen, og vi er berre fokuserte på korleis vi skal slå Iran. Våre tankar er hos det iranske folket og heile nasjonen deira, men fokuset vårt er på kampen, svarte han først.

– Men spelarane og støtteapparatet visste ingenting om kva som vart publisert. Nokre gongar er ting utanfor vår kontroll. Vi har ikkje fokus på desse utanomsportslege tinga, og alt vi kan gjere er å beklage. Men det er ikkje noko vi har vore ein del av, gjentok han.

UQYuJ8BBvvY

Gregg Berhalter og Tyler Adams klarte å bevare roa trass i ei rekkje kritiske spørsmål frå iranske medium.

Foto: JOHN SIBLEY / Reuters

Ein annan reporter spurde om korleis dei opplever at «nesten ingen bryr seg om fotball i USA», der pressesjefen braut inn og informerte om at kampen mot England vart sett av 20 millionar amerikanarar.

– Dette var annleis

Pressekonferansen vekte raskt oppsikt. Den amerikanske sportsjournalisten Leander Schaerlaeckens samanfattar det heile slik:

– Gregg Berhalter og Tyler Adams har no vorte spurt om rasisme i USA, den amerikanske flåten i den persiske gulfen, den høge inflasjonen og om kvifor iranske personar treng visum for å besøkje USA, medan amerikanarar ikkje treng det for å besøkje Iran. Denne pressekonferansen har vore ... annleis, er dommen frå Schaerlaeckens.

– Forhåpentleg vel TV-selskapa å vise Iran- og USA-pressekonferansane i sin heilskap før kampen, skriv James Nalton, som mellom anna dekkjer amerikansk fotball for The Guardian.

Kontrasten var stor frå pressekonferansen Iran-trenar Carlos Queiroz heldt i same rom vel ein time før.

Applaus

Det byrja med at ei rekkje iranske reporterar braut ut i applaus då Queiroz kom til rommet.

Queiroz hadde bestemt seg for å ikkje snakke om politikk på pressekonferansen onsdag. Spørsmål om til dømes Klinsmann-feiden avfeia han med «ingen kommentar».

Men på spørsmål om flagg-situasjonen, vart han litt meir snakkesalig. Ein svensk reporter spurde Iran-trenaren om han vil bruke opptrinnet som ei form for motivasjon i garderoben før kamp.

– Viss eg etter 42 år trur eg kan vinne kampar ved å bruke slike mentale grep, har eg ikkje lært nokonting om spelet. Dette er ikkje tilfellet, innleidde han.

– Eg håpar vi kan lære før framtidige turneringar: Målet vårt her nede er å skape underhaldning, og gjere folk glade i minst 90 minutt. Vi står i solidaritet med alle menneskerettsspørsmål verda rundt, men vi er her for å få folk til å smile. Det er oppdraget vårt i fotballen, seier han.

Då braut det ut applaus frå ei rekkje iranske journalistar i presserommet.

Milad Javanmardy

Milad Javanmardy var blant dei som applauderte Irans trenar på pressekonferansen.

Foto: Egil Sande / NRK

– Er ikkje stemmelause lenger

Ein av dei som applauderte, er Bein Sport-journalist Milad Javanmardy.

Han forklarer bakgrunnen for applausen slik:

– Hovudgrunnen er at vi har oppdaga at vi har ein ekte ambassadør i han. I mange år har vi mangla nokon til å verkeleg snakke saka vår, og eg synest verda skal vite at vi ikkje er stemmelause lenger. Vi har også andre ambassadørar enn Mr. Queiroz, men han har bevist at han er ein verdig ambassadør, seier Milad Javanmardy til NRK.

– Kva slags status har han i Iran no?

– Hos fotballfans har han hatt høg status i mange år. Men etter den anstrengde stemninga her etter det politiske som har prega meisterskapen, har han vore flink til å skjerme spelarane og få fram at dei er der for å spele fotball. På grunn av dette har han fått meir respekt enn nokosinne, meiner reporteren.

n2MzxO9P-6s

Carlos Queiroz fekk applaus på pressekonferansen tysdag.

Foto: GARETH BUMSTEAD / Reuters

Det iranske landslaget har vore i søkjelyset under heile fotball-VM. Under opningskampen mot England bua Irans tilhengjarar då nasjonalsongen vart spelt på stadion. Spelarane nekta å syngje med til teksten.

Det har vore delte kjensler rundt det iranske landslaget, som fekk mange mot seg då dei møtte den iranske presidenten før VM.

– Eg trur dei har vorte pressa

Før kampen mot Wales song plutseleg spelarane igjen, men veldig svakt.

– Eg trur dei har vorte pressa til å syngje. Det var nokon som prøvde å bevege på leppene så vidt, sa den norsk-iranske mediesosiologen Sharam Alghasi til NRK etter kampen.

Les også: Iranske fans reagerer kraftig etter synging: – Vi er imot det som skjer

Norsk-iransk fan utenfor stadion etter kampen mellom Iran og Wales i fotball-VM i Qatar.
Norsk-iransk fan utenfor stadion etter kampen mellom Iran og Wales i fotball-VM i Qatar.

Regimet i Iran, under leiing av ayatolla Ali Khamenei, står overfor nokre av dei største protestaksjonane i landet sidan den islamske revolusjonen i 1979, skriv NTB.

I over to månader har tusenvis av demonstrantar protestert og kravd endringar etter at ein 22 år gammal iransk-kurdisk kvinne døydde i varetekta til moralpolitiet etter å ha vorte arrestert fordi ho ikkje hadde dekt til håret sitt godt nok, opplyser nyheitsbyrået.

– Ein veldig, veldig spesiell kamp

Queiroz sjølv ser fram til kampen, og føretrekte å snakke om det sportslege.

Den profilerte trenaren meiner laget hans er i stand til å utrette endå eit stort resultat og gå vidare i VM for første gong i nasjonens historie.

– I morgon blir ein veldig, veldig spesiell kamp for oss, og for meg spesielt. Å ha høvet til å gå vidare for første gong er noko som gjer oss stolte. Vi vil gjere vårt beste, seier han.

Berhalter ser også fram til det som blir ein historisk kamp for begge lag.

– Eg synest dei er eit veldig godt lag, så det blir ein vanskeleg kamp, seier han.

Avspark er 20.00. Kampen kan du sjå på NRK eller følgje på NRK Sport.

Sportsnyheter

Tror den greske sensasjonen kan ta VM-medalje: – Alt kan skje

Få hadde hørt om greske AJ Ginnis før slalåmrennet i Chamonix. I dag tok han sin første pallplass i verdenscupen. Nå tror den regjerende verdensmesteren at han også kan overraske i VM.

Siste nytt

  • Norsk utklassingsseier på stafetten i junior-VM

    Mathias Holbæk danset seg inn til overlegen seier i den blandede stafetten i junior-VM i langrenn. Avstanden ned til Sverige på 2.-plass ble på 33,4 sekunder.

    Tuva Anina Brusveen-Jensen gikk en strålende tredje etappe og økte forspranget ned til Sverige til 44 sekunder.

    Grunnlaget ble lagt allerede på de to første klassisk etappene.

    Italia tok bronsen. Dette var den første blandede stafetten i junior-VMs historie.

    17 år gamle Milla Grosberghaugen Andreassen ble mesterskapet store juniornavn. Bækkelaget-løperen tok tre gull og én sølv.

    hxGEv34GH1M
    Foto: Terje Pedersen / NTB
  • Mol og Sørum til semifinale i Doha

    Sandvolleyballduoen Anders Mol og Christian Sørum er klar for semifinale i verdenstouren i Doha etter seier over den tyske douen Nils Ehlers og Clemens Wickler.

    De norske OL-mesterne vant med sifrene 21-17, 17-21, 15-10. I semifinalen venter den italienske duoen Adrian Carambula/Alex Ranghieri. Den spilles søndag ettermiddag.

    EM Sandvolley München 2022
    Foto: Lise Åserud / NTB
  • Klæbo og Golberg står over stafetten i Toblach

    Johannes Høsflot Klæbo og Pål Golberg er verdens to beste herreløpere i langrenn, men ingen av dem går søndagens 4 x 7,5 kilometer stafett for Norge i Italia.

    Det var heller ikke ventet. De beste har som oftest mulighet til å bestemme selv om de ønsker å stille på mer eller mindre ubetydelige stafetter i verdenscupen.

    Begge er uansett høyaktuelle startmenn for Norge i VM-stafetten i Planica senere i vinter:

    Dette er Norges 1.-lag i rekkefølgen de stiller (først er det to klassisketapper, deretter to etapper i fristil): Sjur Røthe, Didrik Tønseth, Simen Hegstad Krüger og Harald Østberg Amundsen.

    Norge 2: Erik Valnes, Hans Christer Holund, Iver Tildheim Andersen og Sindre Bjørnestad Skar.

    Norges 1.-lag på for kvinner: Heidi Weng, Anne Kjersti Kalvå, Ingvild Flugstad Østberg og Silje Theodorsen.

    Norge 2: Maria Hartz Melling, Mathilde Myhrvold, Ragnhild Haga og Hanne Wilberg Rofstad.

    Klæbo
    Foto: Laurent Gillieron / AP

Sendeplan

Kl. Program Kanal
Sport
Spiller nå
Norsk-svensk «smørekonflikt» i skiskytter-sirkuset: – Over grensen 01:29
Neste