Storebror spår gullrisiko i finalen: – Der Jakob potensielt kan brenne seg

– Sjansane for at han går på ein smell er tilnærma null, sånn eg har sett han dei siste vekene og i forsøket. Dei skal springe «jækli» fort om han skal gå på ein smell, fastslår Henrik Ingebrigtsen.

For Jakob Ingebrigtsen showa seg lett til finalen på 5000-meteren, og storebroren, som er med til Eugene som den næraste støttespelaren til løpestjerna, trur det vil sjå endå betre ut natt til måndag norsk tid.

Men i den intense jakta på eit VM-gull, ligg det også ein risiko, meiner Henrik Ingebrigtsen

– Han kjem til å gjere alt han kan for å ta gull. Det er der han potensielt kan brenne seg. Sikrar han bronsen, så tek han nok bronse. Sikrar han inn til sølv, så tek han sølv. Men du må risikere alt for å ta gull. Det trur eg Jakob er villig til å gjere.

Berre det beste godt nok

Jakob Ingebrigtsen sjølv gav eit kort svar då NRK spurde han om finalesjansane etter forsøket:

– Eg får gjere det eg kan, og viss det er noko anna enn det beste, så er det ikkje bra nok.

Før VM-start fortalde gullhåpet at han eigentleg kjenner seg som betre på 5000- enn 1500-meter, fordi det er mindre slump. Henrik Ingebrigtsen fryktar eigentleg ingen i det knallsterke finalefeltet.

– Det blir vanvitig spennande og eg lurer på kva slags taktikk dei skal ha for å ta Jakob, for der (på 5000 meter) skal han berre reagere på det dei gjer, påpeikar han.

NRK-kommentator Jann Post trur heller ikkje at nordmannen blir distansert.

– Den einaste moglegheita dei andre har der, er om dei samarbeider og køyrer knallhardt frå start, og ikkje tek ein pauserunde undervegs, som det ofte blir. Då kan dei utnytte at han har hatt ein lang meisterskap, meiner Post.

– Men ingen trur at det skjer, legg han til.

– Mental påkjenning

21-åringen har allereie fire løp i beina, men det er ifølgje storebror ikkje der utfordringa eventuelt ligg.

– Det verste med å springe så mange løp som Jakob gjer, er kvar gong du går igjennom rytmen med forsøk, semi og finale. Kvar gong du startar oppvarminga så er det ei mental påkjenning. Men sånn er det i meisterskap, og det er likt for alle.

– Er det nokon med betre fysiske føresetnader?

– Det er vanskeleg å seie. Men eg veit at Jakob er i form, og det kan eg ikkje seie om det andre, svarer Henrik Ingebrigtsen med eit flir.

Post kjem også med eit råd.

– Han er ein av dei som kan avslutte raskast på ein sisterunde, og det dreier seg ofte om å ha igjen mest krefter då. Det er eit par mann med meir erfaring på langdistanse enn Jakob, så det gjeld å posisjonere seg rett og ikkje dra til for tidleg.

Nettopp det skjedde i Doha for tre år sidan, då Ingebrigtsen rykte med ein runde igjen og vart nummer fem.

– Eg trur han lærte mykje av det og at han veit nøyaktig kva han skal gjere no. Joshua Cheptegei eller Selemon Barega kan vere sterkare, men då er det berre sånn i så fall. Eg trur dette blir eit av dei mest spennande løpa med ein norsk løpar involvert i dette VM-et, med ein svært intens sisterunde, spår Jann Post.

• Sjå finale 5000 meter frå VM på NRK1 natt til måndag kl. 03.05