– Eg har aldri opplevd liknande. At så mange frå same nasjon gjer det så bra i same sesong er unikt, seier landslagstrenar Alexander Stöckl.
Kenneth Gangnes, Johann André Forfang, Daniel André Tande, Andreas Stjernen og Joachim Hauer har alle levert sin beste sesong nokon gong. Dei tre førstnemnde har tatt verdscupsigrar, medan Stjernen og Hauer har klatra opp på pallen.
- Les også:
– Vi har jobba målretta med å utvikla teknikken, fysikken og utstyret, men det er overraskande at det har klaffa for alle. Den største utfordringa no blir å attskapa det til neste sesong, seier Stöckl.
- Les også:
Håpar på topp ti
Før avslutningsrenna i Planica ligg Gangnes på tredje-, Forfang på femte- og Tande på sjuandeplass i verdscupen samanlagt (sjå topp 10 lista nedst). Men med fullklaff i Planica kan det bli fem nordmenn blant dei ti beste.
– Det har aldri før vore fleire enn tre nordmenn topp ti samanlagt, så laginnsatsen har vore utruleg denne sesongen, seier tidlegare hoppkommentator, Arne Scheie.
Anders Fannemel har ikkje levd opp til fjorårssesongen, men ligg likevel på 11.-plass samanlagt. Opp til Roman Koudelka på tiande er det berre 13 poeng, medan han er 39 poeng frå niandeplassen. Andreas Stjernen har 73 poeng til 9.-plass og 47 poeng opp til 10.-plass.
– Etter at det siste rennet i helga vart avlyst, kom Koudelka bort til oss og sa at no er det fordel oss. Våre gutar er betre i skyflyging enn han, seier Stöckl.
– Fem blant dei ti er mogeleg. Det hadde vore ein vanvitig prestasjon, og Koudelka veit at våre beste skiflygarar pustar han i nakken, seier NRKs hoppekspert, Johan Remen Evensen.
Usikkert Stöckl blir med
Gangnes, Forfang, Tande og Fannemel har alle vunne ein verdscupsiger kvar denne sesongen, i tillegg til det overlegne VM-gullet i skiflyging. Suverene Peter Prevc har stått på toppen av pallen heile 13 gonger i verdscupen. Det har berre Gregor Schlierenzauer klart tidlegare.
– Dei norske hopparane har vore stabile i toppen, men dei har ikkje vunne så mange renn denne sesongen. Det er synd, seier Scheie.
Sesongen vert avslutta med tre individuelle renn og ein lagkonkurranse. Der må dei norske hopparane kanskje klara seg utan landslagstrenar Stöckl. Han skal bli pappa i løpet av månaden og har ikkje bestemt seg for om han reiser til Slovenia.
– Eg tar avgjerda tysdags kveld. Fram til no har det ikkje skjedd noko på den fronten, om det skjer ting blir eg heime. Det er renn i Planica kvart år, ein fødsel skjer berre ein gong, seier Stöckl.