Nordmennene sprakk på staånde, men fekk likevel to pallplassar

• Sjå heile resultatlista: 12,5 km jaktstart (menn)

Det blei likevel to pallplassar på jaktstarten i Austerrike for nordmennene. Emil Hegle Svendsen gjekk eit glimrande løp og var berre 7,7 sekund bak vinnar Martin Fourcade i mål.

Tarjei Bøe gjekk ut som nummer fire etter siste skyting, men henta inn og gjekk forbi Christoph Sumann på den siste runden og tok tredjeplassen.

Ole Einar Bjørndalen tok femteplassen 21,2 sekund bak. Lars Berger – som vann sprinten fredag – gjekk inn til ein litt skuffande 14.-plass, 1:12,8 bak.

Vetle Sjåstad Christiansen enda på 31.-plass, medan Henrik L'Abée-Lund gjekk inn til 37.-plass.

– Kan fort bli siger

To nordmenn på pallen er ingen dårleg norsk dag, men etter to skytingar låg det derimot an til norsk siger – med Lars Berger i spissen. Han har aldri vunne ein jaktstart før, men opna med to fulle hus på liggande.

– Lars har imponert stor på liggande her. Held han roa på ståande så trur eg det blir bra, men han må orke å kjempe inn kvart einaste skot, kommenterte NRK sin ekspertkommentator Ola Lunde like før den tredje skytinga.

– Tek han ut potensialet sitt så kan det fort bli siger, meinte NRK-kommentator Andreas Stabrun Smith.

Så kom Berger inn til skyting saman med Martin Fourcade. Der blei det to bom for Berger, medan Fourcade klarte seg med éin.

Vidare følgde Emil Hegle Svendsen opp med éin bom, Tarjei Bøe opp med éin bom og Ole Einar Bjørndalen opp med éin bom.

Fem franske rett ned

På siste skyting kom Fourcade inn i einsam majestet. Der plaffa han fem blinkar rett ned.

– Jada, han vinn igjen, Martin Fourcade. Då er spørsmålet kven som blir med han på pallen, sa Stabrun Smith.

Hegle Svendsen, Bøe og Bjørndalen skaut alle fullt, og dei to førstnemnde tok andre- og tredjeplassen.

Lars Berger følgde opp med tre nye bommar, og måtte surt og bittert skli over målstreken til ein skuffande 14.-plass.