– Han er den mest meritterte av kandidatane, så vi er veldig nøgd med å få den beste trenaren, seier Amin Askar til NRK dagen etter at Rikard Norling vart presentert som ny trenar på Brann stadion.
Fansen fyrte opp bluss og hadde allereie laga nye songar til svensken då han vart presentert som ny Brann-trenar på ein pressekonferanse i går kveld. Norling sjølv tok det heile med eit stort smil. Askar seier spelarane er glade for at den nye trenaren er godt teke imot av supporterane.
– Det har vore ein veldig hallelujastemning, men det er berre positivt. Det skapar forventningar og ny entusiasme. Vi gler oss til å koma i gang. Mottakinga i går var sinnssjuk. Det lukta brent på gymmen så vi flaug rundt å lurte veldig på kva som skjedde, ler Askar.
– Han er «lugn»
28-åringen har ikkje møtt sin nye sjef enno, men seier han har danna seg eit godt inntrykk.
– Han verkar tilbakelent og full av sjølvtillit, smiler Askar og seier spelarane gler seg til første trening.
– Det blir ein stor opptur å starte med ny spenning. Men elles gjeld det same som før. Vi må prestere, Norling kan ikkje skåre måla for oss, seier høgrevingen.
Saka held fram under videoen
– Mange inntrykk
Sjefen sjølv seier det var mange inntrykk å ta inn etter gårsdagens pressekonferanse.
– Eg merka det når eg kom til hotellet etter alt i går. Det var utruleg mange inntrykk, men det viktigaste er at eg kjente meg veldig velkommen. Det er eit tydeleg bodskap om dei forventar at vi og teamet jobbar og gjer vårt beste, seier Rikard Norling.
Han har brukt dagen i møte med leiarar og stab i Bergen. Som dagleg leiar Roald Bruun-Hansen fortalde til NRK i går, er Norling allereie lova midlar til å erstatte Bård Finne og Fredrik Nordkvelle
– I dag har vi prata om korleis arbeidet mitt blir, og vi har snakka om støtteapparat og spelarstall. Korleis det ser ut og korleis det kan sjå ut.
Skal studere stallen
Norling seier han skal bruka tida framover til å studere videoar av kampar som er spelt, slik at han får eit totalbilete til dei byrjar med treningane att.
– Det handlar om å førebu slik at spelarane får dei føresetnaden som skal til for at dei slår ut i full blomst.
Optimismen rår i hjå supporterane, bedrifter og føretak som er tilknytt klubben. Norling meiner det er viktig for å skapa suksess.
– Det er jo veldig bra om det er slik. Eg kjem her og kan ikkje skilja mellom det som er no og det som har vore. Men optimismen gjer at det blir ein god grobotn for å skapa noko bra her.
Vil ha nye spelarar
Amin Askar vart samd om ny kontrakt på fire år med Brann i oktober. Ein av føresetnadane var at klubben skulle signere nye spelarar.
– Eg er her for å vinne, og vi treng å forsterke stallen for å ta steget opp. Nye spelarar er velkomne, avsluttar Askar.
Norling vert ønskt velkommen av spelarane på Twitter