Solemdal: – Forhåpentlegvis ein djup dalbotn

– Eigentleg er det to litt ræva skirenn, men no er eg i gang. Eg vann ikkje i sesongopninga på Beitostølen i fjor heller, for å seie det sånn, seier Solemdal til NRK.

24-åringen frå Tingvoll tok sin første verdscupsiger i Hochfilzen i desember i fjor. I tillegg står ho med tre VM-gull – eitt på stafett, to på mix-stafett.

På Sjusjøen blei det 21.-plass i sprinten laurdag. Søndag blei det 19.-plass på fellesstarten for eitt av håpa bak suveren Tora Berger.

• Les også: Berger fintet ut av speaker og musikk

Var langt nede

Etter første rennet laurdag var nordmøringen veldig langt frå fornøgd.

– I går var eg litt uroa, det skal eg innrømme. Då var eg langt nede, og det var nokre tankar i natt, innrømmer Solemdal.

Sjølv om det blei tre bom på ti skot laurdagen, var det skigåinga som uroa henne mest.

– Eg synest det var for dårleg i går. I dag opna eg ganske roleg, for eg var litt skremt frå det som skjedde laurdag.

– Det losna litt på slutten i dag, men eg kjenner jo at eg ikkje er heilt der eg skal vere. Men eg er ikkje like uroa som i går, fortel Solemdal i prat med NRK.

Pusten er endeleg god

Det finst derimot eitt lyspunkt for Solemdal: pusten og pusteteknikken er på plass.

– Ja, den er kjempefin, slår ho fast.

24-åringen, som har astma, har slite med dårleg pust i mange renn tidlegare. Ho hadde rett og slett for dårleg pusteteknikk.

• Les også: Solemdal skremt av pusteproblemer etter 15-kilometeren
• Les også: «Mystisk sykdom» var dårlig pusteteknikk

Etter visittar på Haukeland universitetssjukehus, tallause timar i pustemaskin og mykje testing, er derimot pusteteknikken på plass.

– Det handlar mykje om å slappe av i heile øvste delen av kroppen. Puste med magen og sleppe ned skuldrene, og det synest eg går fint no, seier Solemdal.

– Så her på Sjusjøen er det rett og slett forma mi. Eg har opplevd svingingar opp og ned tidlegare, så no er det forhåpentlegvis i ein djup dalbotn og så går det berre oppover, avsluttar ho.