– Eg er veldig nøgd med gjennomføringa av kampen, seier Solbakken til Viasat etter kampen.
Etter 0-1-tapet borte mot Leicester i førre runde håpa Ståle Solbakken på revansje i dagens oppgjer i meisterligaen.
Men ingen av laga makta å skåre i Parken, og dermed står Leicester framleis utan baklengsmål i meisterligaen.
Ranieris lag er også på god veg til åttedelsfinale.
FCK køyrde opninga
Ståle Solbakkens menn kopla tidleg eit hardt grep om kampen, og var det leiande laget i heile den første omgangen.
Trass mange gode FCK-angrep, klarte danskane aldri å komme til dei verkeleg store sjansane. Men det gjorde heller ikkje dei blåkledde gjestane.
Leicester låg lågt i bana heile den første omgangen, og tok dei kontringssjansane dei fekk, utan å vere særlege farlege framom mål.
Dermed gjekk laga til pause på stillinga 0-0
Sjansefattig
Men i den andre omgangen tok Leicester over grepet i kampen. FCK hamna bakpå, og slapp Leicester til i mykje større grad.
Likevel var det København som kom til den største sjansen i det 70. minutt. Då fekk Bejnamin Verbic stå ledig inne i 16-meteren, og fekk to gylne sjansar til å sette ballen i mål.
Det fekk han ikkje til.
Etter 70 minuttar spel fekk Robert Huth ballen i handa innanfor 16-meteren. FCK ropa på straffe, men dommaren gjorde ingenting.
I sluttminutta var det framleis høg intensitet i kampen, og FCK kom til kampens største desidert største sjanse i det 89. minutt. Cornelius header mot mål, men Schmeichel gjorde eit tigersprang, og fekk avverga mål.
– Me får same type kamp mot Porto, og vinn me er me i pole position, seier Solbakken.
No gjenstår ein viktig heimekamp mot Porto, og ein bortekamp mot Club Brugge. FCK har framleis gode sjansar til å komme vidare i meisterligaen.
– Me lever, konstaterer Solbakken.
