Omkamp etter afrikansk skandale-finale: Må levere tilbake pokal og medaljar

Det marokkanske laget Wydad Casablanca nekta å spele den siste finalekampen ferdig då dei fekk annullert eit mål som såg heilt ok ut, og det viste seg at VAR-teknologien ikkje fungerte.

Klubben anka, og styret i Afrikas fotballforbund (CAF) bestemte onsdag at det skal spelast omkamp på nøytral bane. Tunisiske Esperance, som blei erklært som vinnar etter skandalekampen fredag, må levere tilbake vinnarmedaljane og meisterskapspokalen.

– Tryggingstiltaka og tilhøva rundt kampen var ikkje gode nok, skriv CAF i grunngjevinga.

Det er venta at Esperance vil anke CAF-avgjerda. Ikkje minst fordi IFAB, organisasjonen som fastset regelverket i fotball, slår fast at VAR-svikt åleine ikkje kan vere grunn til å annullere ein kamp.

Omkampen vil uansett ikkje bli spela før etter Afrika-meisterskapet for landslag, som blir avslutta 19. juli.

VAR var ikkje der

Det var sist fredag returkampen i den afrikanske meisterligafinalen blei spela i Tunisia.

Første kamp i Marokko hadde enda 1–1. Framfor 60.000 tilskodarar i Tunis tok Esperance leiinga like før pause i returkampen, før Casablanca utlikna etter 62 minutt.

Trudde dei. For dommaren annullerte det som såg ut som eit heilt greitt mål. Casablanca protesterte heftig, kravde at VAR-folka måtte gripe inn, og at dommaren måtte sjå på videobileta.

På sidelinja stod det som såg ut til å vere VAR-skjerm, slik retningslinjene for kampen kravde.

Problemet var at VAR ikkje verka. Det hadde det ikkje gjort under heile kampen, og dommarane visste det. Men ikkje lagleiarane og spelarane. Derfor fekk aldri dommaren sjå videoopptaket for å vurdere situasjonen på nytt.

Forlét bana i protest

Casablanca protesterte høglydt, og nekta å halde fram kampen. Dommarane og leiinga i CAF – det afrikanske fotballforbundet – prøvde i halvannan time å overtale det rasande laget til å spele kampen ferdig.

Men dei lykkast ikkje. Til slutt tok kampleiinga avgjerda om å avslutte kampen, og CAF tilkjende Esperance meisterskapet med 2-1 samanlagt og plass i klubb-VM til vinteren.

Det kom til handgemeng mellom representantar for dei to laga då dei gjekk av bana.

Sjølvsagt protesterte Casablanca, og CAF-styret tok altså protesten til følgje på styremøtet sitt i Paris.

Utanfor møtelokalet demonstrerte fleire hundre tilhengarar frå begge lag med mellom anna ordet «korrupt» på nokre av bannera.

Utestengd i seks månader etter første kamp

Det høyrer også med til historia at i første kamp, som altså enda 1-1, fekk Casablanca først eit mål annullert, så fekk dei ikkje medhald i krav om straffespark. Dessutan fekk dei ein spelar utvist. Men i den kampen verka iallfall VAR.

Etterpå blei kampens egyptiske dommar utestengd i seks månader.

PS: Onsdag kveld vann Wydad Casablanca 4-1 i ein utsett kamp og sikra seg seriemeisterskapet i Marokko. I Tunisia har Esperance sikra seg serietittelen tidlegare.