Skadeplaga Moen ofrar prestisjen i EM: – Ikkje den beste som vinn

Han skulle helst ha delteke på 10.000-meter, men Sondre Nordstad Moen prioriterer i staden ein distanse han meiner ikkje har så høg prestisje i EM.

Sondre Moen

HÅPER PÅ MARATONMEDALJE: Sondre Nordstad Moen er ikkje optimalt førebudd, men håper likevel på medalje på maraton under EM i Berlin søndag.

Foto: Fredrik Hagen / NTB scanpix

– Sett vekk frå OL har maratonane under meisterskapa mindre status enn dei større bymaratonane. Det er ein større prestasjon å vinne 10.000 enn maraton under EM, seier landets beste langdistanseløpar.

– Vinn du London Maraton, så er du best. Men du er ikkje nødvendigvis verdas beste om du vinn maraton under VM, utdjupar Sondre Nordstad Moen.

Søndag skal han i aksjon under EM i Berlin, men altså ikkje på den distansen han helst skulle ha delteke på.

– Maraton passar betre

Moen føler seg rett og slett ikkje i god nok form til å delta på 10.000 meter, der han mislukkast under Bislett Games i vår.

Sondre Moen

Sondre Nordstad Moen har slite med skadar og sjukdom etter det fantastiske løpet i desember.

Foto: Fredrik Hagen / NTB scanpix

– Etter Bislett Games har eg ikkje klart å gjennomføre dei baneøktene som må til for å hevde seg på den distansen. Lyskeproblem har sett ein stoppar for det. Men det har gått greitt å trene med lågare fart. Då passar maraton betre, forklarer Moen til NRK.

Det var i desember 2017 trønderen sprang inn til tida 2.05,48 under Fukouka Maraton i Japan. Ingen europear hadde nokon sprunge raskare på den tradisjonsrike distansen.

Problematisk sesong

Ein skulle kanskje då tru at Moen skulle vere storfavoritt under søndagens EM-maraton. Så enkelt er det ikkje. Moen har nemleg slite med skade- og sjukdomsproblem gjennom store delar av året.

Oppladinga til EM har derfor vore alt anna enn optimal.

– Eg kan berre fokusere på det eg kan få gjort noko med, seier Sondre Nordstad Moen.

Og utdjupar:

– Når du står på startstreken har du gjort det du kan på førehand og må gjere det optimale ut av situasjonen. I toppform eller ei, ein får berre gjere det beste ut av det.

Sondre Nordstad Moen

Sondre Nordstad Moen skulle gå for norsk rekord på 10.000 meter, men det gjekk tyngre enn venta. Tida vart 28.37,92.

Foto: Vidar Ruud / NTB scanpix

To medaljekandidatar?

Sjølv om Moen verken er i toppform eller deltek på distansen han meiner har mest prestisje, ser han ikkje vekk frå at han kan reise heim frå Berlin med medalje rundt halsen.

– Kjem eg i mål, er eg ein medaljekandidat, meiner 27-åringen.

Som er glad for at temperaturen i Berlin har gått litt ned dei siste dagane. Likevel trur han verken han sjølv eller andre kjem til å nærme seg supertida hans frå desember. Moen ser for seg ei vinnartid rundt 2.11 eller 2.12.

Sondre Nordstad Moen er ikkje det einaste norske håpet på maraton. Weldu Negash Gebretsadik, som ikkje fekk godkjenning til å delta før sist veke, stiller på startstreken med ei offensiv haldning.

– Eg har trena mykje og forma er bra. Eg håper på medalje, smiler Gebretsadik.

Weldu Negash Gebretsadik

Weldu Negash Gebretsadik budde på asylmottak då han tilfeldigvis vart oppdaga av ein mosjonist då han var ute og trena.

Foto: Fredrik Hagen / NTB scanpix

Siste nytt

  • Nigeria tok Afrika-bronsen

    Tidlegare Lyn-spelar Odion Ighalo scora etter berre to minutt, og Nigeria slo Tunisia 1-0 i bronsekampen i Afrika-meisterskapet i fotball.

    Finalen mellom Algerie og Senegal blir spela fredag.

    Odion Ighalo
    Foto: Sumaya Hisham / Reuters
  • Nguen scora i Ferencvaros-siger

    Ungarske Ferencvaros er vidare i meisterliga-kvaliken etter 3-2 borte og 5-3 samanlagt mot Ludogorets Razgrad. Norske Tokmac Nguen scora lagets tredje mål like etter pause.

    Tokmac solgt.
    Foto: Ned Alley / NTB scanpix
  • Okparaebo med årsbeste på 100 m

    Ezinne Okparaebo løp inn til ny årsbeste i Norge på 100 meter med tiden 11,43 under et stevne på Bislett onsdag.

    Hun senket med det den norske bestenoteringen for året, som også var hennes, med fem hundredeler.

    Laster Twitter-innhold

Sendeplan

Kl. Program Kanal