– Eg fekk mail for nokre dagar sidan om at eg var aktuell, og blei litt sett ut. Og då innkallinga kom i dag, vart eg vel eigentleg endå meir sjokkert, seier Thorisdottir til NRK.
– Men eg vart naturlegvis veldig glad også, legg ho til.
Nytilsett landslagssjef Martin Sjögren tok ut 23-åringen frå Klepp i sin første landslagstropp i dag, trass i at ho ikkje har spela ein kamp på snart eitt og eit halvt år.
Fekk tung beskjed
Thorisdottir reiv av eit leddband i ein kamp mot Avaldsnes i august 2015, og fekk på eit tidspunkt i fjor vår beskjed om at karrieren truleg var over.
– Det var tungt, seier ho. – I lang tid kunne eg ikkje gå skikkeleg, og mange gonger tvilte eg på om eg kunne halde fram.
– Men eitt eller anna inne i meg sa at eg ikkje skulle gi opp, og eg har halde fram med å trene, seier 23-åringen. I september var ho tilbake i fotballtrening.
– No er eg frisk, seier ho. – Foten har respondert bra, og eg har kjent at fotballformen har kome veldig fort. Det har eg ingen problem med. Men det er lenge sidan eg spela kamp, og eg har heller ikkje trena for fullt kvar dag.
Vil til EM
No har ho som mål å kunne trene fotball og vere ein del av laget kvar dag. Og ho vil gjere det best mogeleg med Klepp når sesongen tek til.
– Og så har eg som mål å kome til EM med landslaget til sommaren, seier Thorisdottir, som var med i VM i Canada i 2015, før ho blei skadd.
Maria Thorisdottir trur at ny landslagssjef kan vere ei av årsakene til at ho er innkalla til troppen på 24 spelarar.
– Martin kjenner situasjonen min, og han vil nok lære både meg og andre betre å kjenne. Han vil nok vite korleis vi er som personar både på og utanfor fotballbanen, seier Thorisdottir.
Ny i troppen er også Urædd-spelar Nora Eide Lie (19). – Ho er ein veldg spennande spelar, seier Sjögren til fotball.no.
Også Caroline Graham Hansen er med igjen etter skade.
Norge skal møte Sverige og England under opphaldet på La Manga.
