Sjokk-exit for Djokovic - ute av Wimbledon

Med Rafael Nadal ute med skade låg alt an til at verdenseinar Novak Djokovic skulle spasere til sin tredje strake Wimbledon-tittel.

Slik blei det ikkje.

Allereie i den tredje utslagsrunden gjekk Djokovic på ein kjempesmell mot amerikanske Sam Querrey, som er ranka som nummer 41 i verda. Djokovic tapte 3-1 i sett og er dermed ute av verdas største tennisturnering.

Regntrøbbel

Kampen, som starta allereie i går, har blitt avbrote fleire gonger av regn.

– Eg var klar for å starte på nytt i dag, men det var Djokovic også. Eg var heldig som fekk eit nytt regnbrot, slik at eg kunne samle meg, seier vinnar Querrey. Han var tydeleg stolt av eigne prestasjonar i intervjuet etter kampen.

– Det er heilt fantastisk, særleg her i Wimbledon, den største turneringa i verda.

Men sjølv om han slo verdenseinaren, vil han ikkje sjå på seg sjølv som nokon favoritt i turneringa.

– Han er kanskje det beste nokon sinne. Men no tek eg det ein runde om gongen. Eg er fornøgd allereie.