– Vi fekk ikkje ut det vi ville i Egypt. Det kan kome av mykje, seier Sagosen til NRK, men det er spesielt éin ting han trekker fram som ein potensielt utløysande faktor:
– No var vi faktisk gullfavorittar, og vi hadde enorme forventningar til oss sjølve. Det er ikkje alle på laget som er vand til å spele med den typen press i klubblag eller på landslag.
Det vart ikkje den meisterskapen Sagosen og Noreg hadde håpa på. Handballgutane rauk ut i kvartfinalen mot Spania og måtte reise heim tidlegare enn planlagt. Om ikkje lenge vil truleg den same utfordringa møte landslaget.
Favorittar òg i OL
Men sjølv om Noreg ikkje lykkast denne gongen, er ikkje den største stjerna til landslaget i tvil. Viss det blir OL i Tokyo til sommaren, må dei rekne med å ha det same favorittstempelet som i VM.
– Vi skal absolutt vere med å spele om gull der. No har vi lært korleis det er å spele med press. Nøkkelen ligg nok i å ikkje bry seg om kva andre seier og berre kose oss med handballen. Får vi til det, kjem vi til å vere med der oppe, seier Sagosen.
NRKs handballekspert, Håvard Tvedten, er samd med Sagosen. I eit eventuelt OL, kjem dei aller fleste i årets VM-tropp til å vere med. I tillegg kan Noreg få tilbake viktige spelarar i Magnus Abelvik Rød og Magnus Gullerud.
– Eg trur at Noreg har potensial til å ta eit OL-gull, viss det blir gjennomført. Det har dei eit godt nok lag til, meiner Tvedten.
– Evalueringa vil gi svar
Landslagstrenar Christian Berge fortel til NRK at spelarane skal gjennom ei evaluering av meisterskapen. Mentalt press kan bli eit tema i framtida dersom det kjem fram i evalueringa at spelarane opplevde det som eit problem i Egypt.
– Til VM førebudde vi oss som vi alltid gjer. Favorittstempelet kjem ikkje frå oss, men andre. Vi var òg klar over Spanias styrker, seier Berge til NRK.
Han vil likevel ikkje svare på korleis forventningspresset eventuelt påverka spelarane. Grunnen er at meisterskapen enno ikkje er evaluert.
På generelt grunnlag trekkjer Berge fram følgande:
– Det er tid og erfaring som vil hjelpe spelarar. Jo fleire gonger ein står i ein situasjon, jo meir komfortabel blir ein i han.
Positive skadenyheiter
Sagosens skade må ta noko av skulda for tapet mot spanjolane. No kan stjernespelaren tryggje alle med at skaden Ikkje er alvorleg.
– Det var ein slagskade, akkurat som vi trudde. Det var ei bløding i ein muskel over hoftekammen, som gjorde det umogleg å spele. Men det er ikkje noko alvorleg, og eg er tilbake i kamp igjen anten torsdag eller til helga, fortel Sagosen.
– Var du redd for at det skulle gå verre?
– Eg har aldri hatt så akutt vondt før. Eg følte meg heilt hjelpelaus og sleit med å stå oppreist og puste. Så med ein gong det skjedde, var eg sikker på at det skulle vere noko alvorleg, ja.