– Det kunne ikkje blitt verre eigentleg.
Magnus Krog har ein tung søndagskveld etter å fått konstatert brot i handleddet. 32-åringen må dermed avbryte sesongen etter berre ein månad.
Var akkurat tilbake frå skade
10. januar var han tilbake i verdscupen etter å ha fått den fyrste delen av sesongen øydelagd etter fall i NM i november.
Nå må han gå med gips i tre veker og sesongen som akkurat hadde starta er over.
– Det har vore maks uflaks for meg denne sesongen. Når eg fyrst var tilbake var det fleire frihelger fordi FIS anten ikkje har funne arrangør eller renn som har blitt avlyst på grunn av den dårlege vinteren. Nå hadde eg akkurat kome tilbake i toppen, så er sesongen over, seier ein oppgitt Krog som laurdag gjekk inn til fjerdeplass i Granåsen.
Riiber blei historisk
Mens Krog gjekk rundt i løypene med store smerter i handa, gjekk Jarl Magnus Riiber i einsam majestet inn til sin 13. verdscupsigeren sin for sesongen. Det er meir enn nokon annan kombinertløpar har klart.
Med det sikra han òg samanlagdsigeren i verdscupen for andre år på rad.
Men medan sigerskampen i Granåsen blei relativt udramatisk, var det meir dramatisk for Magnus Krog. Han skadde seg alt etter tre kilometer, men fullførte likevel løpet utan å kunne bruke den eine handa.
– Eg forstod med ein gong eg datt at det var brot. Det høyrde eg på lyden. Eg burde kanskje ikkje gått vidare, men eg skjønte at sesongen var over så da kunne eg like godt gå i mål.
Håpar Krog ikkje legg opp
Nå håpar sportssjefen at rennet på søndag ikkje var det siste me har sett av gullvinnaren frå Sotsji-OL i løypa.
– Me håpar veldig at han vil vere med vidare og rette blikket mot Oberstdorf-VM og Beijing-OL. Han har vore ekstremt uheldig dette året her, men eg trur han har ein del ugjort som kombinertløpar, meiner Stuan.
Sjølv veit Høydalsmo-løparen ennå ikkje om vil halde fram karrieren eller ikkje. I fjor vår kom han fram til at han ville ta eitt år av gangen.
Nå skal han bruke tid på å finne ut om han satsar mot VM.
– Det er iallfall kjempemotivasjon å sjå at eg nesten klarte å kome tilbake i toppen. Eg har nok trent minst av alle i dette feltet i dag, så noko riktig må eg ha gjort.
TYDELEG HEMMA: Magnus Krogs venstre arm fungerte dårleg etter uhellet.
Foto: Mikal Aaswerud / NRKTil sjukehus
Krog var synleg hemma under rennet, og kunne nesten ikkje bruke den venstre armen sin. Likevel fullførte han løpet til ein 14.-plass. Så gjekk han rett bort og gratulerte lagkameratane Jarl Magnus Riiber, Jens Lurås Oftebro og Espen Bjørnstad med pallplassane.
Deretter bar det rett inn til Røde Kors. Etter undersøking der, vart han send vidare til St. Olavs hospital for røntgen. Det var kanskje ikkje det luraste å fullføre rennet, men sportssjef Stuan forstår valet.
– Når han er 32 år, har han vel lyst til å få med seg så mykje som mogleg i karriere, og då har han lyst til å gjennomføre på heimebane. Men det er klart det ikkje er lurt, han skulle sikkert vore tatt ut, men han ville ikkje. Så han er ein tøffing, seier Stuan.
– Såpass, ja. Han er ein ulykkesfugl, eg unner han ikkje motgangen han har hatt, så eg håpar den fingeren blir lækt raskt, seier Riiber når han får høyre om skaden til lagkameraten.
SUVEREN: Jarl Magnus Riiber er sesongens strore kombinertløpar.
– Føler meg uovervinneleg
Likevel gler han seg naturlegvis over den 13. sigeren sin på 15 startar i vinter og ein ny siger i verdscupen.
– Eg har endeleg slått Hannu Manninen rekorden sin med fleste sigrar på ein sesong. Eg har berre prøvd å gjere det beste kvar helg og sjå kva det held til, og det har halde bra denne sesongen, konstaterer han nøkternt.
Riiber erkjenner at det meste går av seg sjølv for augneblinken.
– Det er ei ganske utruleg kjensle. Du får ein sjølvtillit det er vanskeleg å kvitte seg med. Eg føler meg litt uovervinneleg.
