– Eg trudde det skulle vere noko større entusiasme rundt eit Oslo-OL i 2022, seier Heiberg til NRK.
Dei sju olympiske vinteridrettsforbundene har allereie gått samla inn for at Norge og Oslo skal søke om vinter-OL i 2022.
Men det norske folk er splitta i spørsmålet om hovudstaden bør arrangere OL-fest.
Ei undersøking gjennomført av Norstat for NRK viser at nøyaktig 50 % av landets befolkning er klart og tydeleg positive.
Nesten fire av ti nordmenn, eller meir korrekt 38 %, vil ikkje at Norge skal søke.
12 % av dei spurde vil verken svare ja eller nei.
- Kva meiner du? Bør Norge søke om OL i 2022? Diskuter i kommentarfeltet!
Heiberg: – Norge bør ikkje søke om fleirtalet er imot
Gerhard Heiberg, som er medlem i den internasjonale olympiske komité, ropar på ingen måte hurra når han får presentert tala.
– Litt skuffa er eg nok, seier Heiberg til NRK.
Han håpar og trur at interessa aukar vesentleg med tida.
– Det er vel litt tidleg å konkludere enno. Først må denne saka gjennom behandling i Oslo bystyre og ekstraordinært idrettsting. Om desse rundane endar positivt trur eg ja-sida vil stige kraftig, og det relativt fort, seier Heiberg og legg til:
– Ein bør ikkje søke om fleirtalet er imot. Eg vil minne om at det før Lillehammer-OL var 60 % for og 40 % imot ein søknad, etter det eg hugsar. Det synst vi i IOC er bra.
Dei eldre bremsar OL-entusiasmen
Det er spesielt hos den eldre delen av folket at fleire er lite positive.
Aldersgruppa under 30 år er den einaste i undersøkinga som viser framlegg til eit rungande OL-ja.
Heile 65 % av landets befolkning under 30 meiner at Oslo er rette staden for OL i 2022.
47 % av dei over 50 år vil ikkje høyre snakk om at Norge og Oslo søker om OL i 2022.
Tala får ikkje Oslo-ordførar Fabian Stang til å hoppe i taket.
– Entusiasmen bør bli endå større, seier han, men påpeiker samstundes at han synst «ja»-sida generelt sett er overraskande stor.
- LES OGSÅ: Desse anlegga må Oslo bygge
Her bur skeptikarane og optimistane
Optimismen rundt ein OL-søknad er aller størst på Sørlandet og Austlandet. Men heller ikkje her kjem eit rungande «ja!» frå eit samla folk.
Skepsisen er aller størst i Nord-Norge. Med 45 % «nei» er landsdelen er den einaste med eit fleirtal av skeptikarar.
Så mange seier ja (grupper inndelt i landsdel):
- Sørlandet inkl. Telemark: 57 %
- Austlandet: 55 %
- Vestlandet: 44 %
- Midt-Norge: 48 %
- Nord-Norge: 40 %
- Oslo: 48 %
Så mange seier nei:
- Sørlandet inkl. Telemark: 25 %
- Austlandet: 34 %
- Vestlandet: 41 %
- Midt-Norge: 43 %
- Nord-Norge: 45 %
- Oslo: 40 %
Så mange er usikre:
- Sørlandet inkl. Telemark: 18 %
- Austlandet: 11 %
- Vestlandet: 15 %
- Midt-Norge: 9 %
- Nord-Norge: 15 %
- Oslo: 12 %
Les meir under biletet ...
Lang veg fram til OL
Framleis er det lenge igjen til OL-arrangøren for 2022 endeleg er klar. Men allereie om ein månad vil Oslo bystyre behandle saka om Oslo kommune vil gå vidare med ein søknadsprosess.
I juni må eit ekstraordinært idrettsting avgjøre om Oslo-søknaden skal takast vidare.
- Etter dette må idretten søke om statsgaranti. Det betyr at Regjeringa og Stortinget må gå inn for å garantere at Norge kan gjennomføre arrangementet.
- Innan 2014 må Norge varsle Den internasjonale olympiske komité (IOC) om at det kjem ein søknad.
- Sjølve søknaden må vere innlevert i løpet av 2014.
- I juni 2015 avgjør IOC kven som får OL.
– Forbunda må stå saman
Heiberg, som allereie har påpeikt at godt over halvparten av folket bør støtte OL-søknaden, understrekar at det også er viktig at alle idrettsforbunda står samla i prosessen.
– Om sommaridrettane og vinteridrettane står saman trur eg mykje er vunne, seier Heiberg.
Men førebels er heller ikkje alle forbunda på «ja»-sida. Svømmeforbundet og president Per Rune Eknes står enno på at Norge ikkje bør søke om eit OL i 2022.
Dette fordi det enno ikkje er klarlagt nokon god økonomisk plan for OL-søknaden, meiner han.
– Generelt sett har vi råd til eit OL, men dersom dette skal løysast innanfor idrettens finansiering er vi imot. Det ligg ikkje middel til eit OL, slik idretten er finansiert i dag.
Presidenten er bekymra for at sommaridrettane vil hamne i bakevja i åra før og etter 2022. Dette ved at idrettar som svømming ikkje får tildelt tilstrekkelege middel.
Også Eknes rynkar på nasen over tala frå Norstat.
– Eg er overraska over at «ja»-sida ikkje var større, seier han.
– Desse tala viser jo at vi ikkje er dei einaste skeptikarane her, legg Eknes til.
– Verre om fleirtalet hadde vore imot
Ein sommaridrett som står på motsett side er friidrettsforbundet. Her synst presidenten at OL-entusiasmen er god nok på dette tidspunktet.
– Dette var jo veldig oppløftande tal, seier Svein Arne Hansen.
– Ein veit jo at ei stor del av befolkninga ikkje er interessert i vinteridrett i det heile. Hadde ein spurt dei som var interessert, ville nok fleire enn halvparten ønska eit OL, legg han til.
Presidenten i skiskyttarforbundet, Tore Bøygard, trur årsaka til den noko lunkne optimismen er uvisse i store delar av befolkninga.
– Eg trur ikkje folk har brukt mykje tankeverksemd når dei har svara på spørsmålet rundt ein slik søknad. Haldninga er noko avventande, men eg trur det vil bikke over i ein meir positiv retning etter kvart, seier Bøygard.
Hansen i friidrettsforbundet påpeiker at det ville sett mykje verre ut om fleirtalet var negativt innstilt til ein OL-søknad.
– Hadde tala vore motsett ville det ha svekka arbeidet med søknaden, avsluttar han til NRK.