Maren Lundby gjorde nemleg retur til verdscupen, over 600 dagar sidan siste internasjonale konkurranse, i det som blei ein stor, norsk dag.
Silje Opseth fekk ein draumestart på sesongen.
– Dette byggjer sjølvtillit som eg kan ta med meg vidare. No kan eg senke skuldrene, seier Opseth til NRK, som sleit med å halde nervane i sjakk før start.
Heldigvis var hoppdronning Lundby tilbake, og det hjelpte.
Under radaren
Opseth hadde store problem med å få sove før hopprennet laurdag. Ho var spent, og hadde ein uroleg kjensle i kroppen.
– Eg fekk ikkje sove så mykje i natt. Eg kjenner mykje på spenninga og det kriblar godt i magen, men det er ikkje noko nytt. Det pleier å vere søvnlause netter, men det er heldigvis ein god ting som skjerpar systemet, seier ho.
Og det hjelpte å ha Lundby tilbake, om vi skal tru Opseth.
– Det er alltid godt å ha ho med i bakken, og det er greitt for meg å gå litt under radaren og kline til. Eg får det litt rolegare rundt meg, og det set eg pris på, seier ho.
– Kva betyr det for laget at Lundby er tilbake?
– Det betyr at vi har eit enda sterkare lag, først og fremst, og det er alltid godt å ha ho med i bakken. Så trur eg det betyr aller mest for ho sjølv. Ein ser det på ho, ho går rundt som ein solstråle, seier Opseth.
Hoppsjef Clas Brede Bråthen trur det at Lundbys retur var ein suksessoppskrift for Opseth.
– Vi veit at Silje har eit ekstremt høgt potensial, som ho dokumenterte solid i dag. Kanskje det hjelpte å ha med Maren att. Vi hadde ikkje drøymt om at det skulle bli så bra, men vi hadde jo håpa på det, seier han til NRK.
No haustar Opseth skryt frå alle hald, og lagvenninne Lundby, meiner ho er blitt god nok til å kjempe om topplasseringar i kvart einaste renn.
STERK LEVERANSE: Silje Opseth fekk ein draumeopning på sesongen, i det som var det første verdscuprennet arrangert for kvinner i Wisla i Polen.
Foto: Adam Nurkiewicz / AP– Rått
Maren Lundby er stolt over lagvenninna, men overraska.
– Det er heilt rått. Ho leverer med ein gong. Eg har aldri tvila på ho, men det imponerer meg at ho leverer frå start, seier Lundby til NRK.
TILBAKE: Maren Lundby.
Foto: Ole Berg-Rusten / NTB– Kva kan vi vente oss av ho i framtida?
– Eg trur ho er meir stabil enn ho har vore. Toppnivået held til å vinne. Klarer ho å halde fram, kan ho vere med å kjempe i toppen heile tida. Eg har trua på Silje i år, seier Lundby.
Sjølv er trenar Christian Meyer forbausa over leveransen frå dei norske.
– Det er heilt fantastisk. Totalen er litt overraskande, og at vi vinn. Eg hadde eit håp om topp fem. Eg må klype meg i armen, seier Meyer.
Han held fram:
– Det var ingenting som beit på ho. Det er kjempedeileg, og då har vi i alle fall gjort noko riktig i ressursperioden. Det er ei lette, før vi byrjar å rette fokus framover att, seier han vidare.
Comeback
Maren Lundby hadde sjølv sett seg mål om å bli topp 15. Det enda med ein 16.-plass, etter å ha ligge som nummer 12 etter første omgang.
– Det skal ikkje stå på innsatsen. Eg tykkjer det var ålreit eigentleg. Eg hadde sett mål om topp 15, blei nummer 16, og 12 etter første omgang. Eg må seie meg fornøgd, seier ho.
Likevel tykkjer ho det er spesielt å ikkje vere med å kjempe om topplasseringar, og at det pregar spenningsnivået.
– Det har vore veldig fint å vere tilbake. Det er mange nervar knytt til hopprenn, men eg må jobbe litt for å få den spenninga. Utanom det er eg veldig glad for å vere tilbake. Eg ser lyst på framtida.
Trenar Meyer er stolt over Lundby.
– Eg er veldig imponert over Maren, det ho leverer i dag. Det er svært bra nivå, seier Meyer.
