Opnar opp om einsemd: – Du går rundt og testar stemma, for du snakkar aldri med nokon lenger

– Du gløymer til slutt korleis det er å oppføre seg rundt andre menneske. Du går rundt og testar stemma, for du snakkar aldri med nokon lenger, fortel Sjåstad Christiansen ærleg.

Han viser oss rundt på Ullerntoppen der han bur.

– Synnøve Solemdal bur jo der, og Erlend Bjøntegaard bur rett der borte. Me skiskyttarar held stand i nabolaget her, seier han og smiler.

Det er ikkje noko pinleg stille når ein møter Vetle. Han er ein sosial type. Derfor har det siste året vore tøft for skiskyttaren.

– Det har vore «jæsklig seigt»

Ein må ofre mykje som toppidrettsutøvar. Det blir mindre tid til dei ein er glad i, men for Sjåstad Christiansen nådde det ei grense i sesongen som var.

– Til vanleg går det greitt. Me er vande med å vere mykje borte. Det er noko me godtar når me får lov til å halde på med det me elskar, men i år har det vore ekstra spesielt med omtrent ti dagar i karantene både i forkant og i etterkant, under tvang, av utanlandsopphald, fortel han.

Han har rekna seg fram til at i perioden mellom 1. november og 1. april såg han venner og familie totalt i fire-fem dagar.

– Det har vore «jæsklig» seigt, all den karantenen og alt med å reise bort, innrømmer Sjåstad Christiansen.

Sosial stimuli fekk han heller ikkje særleg mykje av på reise med landslaget. Lagkameratane fekk ikkje bu på rom saman, og dei såg nesten ikkje til kvarandre utanom i sjølve renna.

– Me var ganske restriktive på å ikkje bli kvarandres nærkontaktar, så da var det vel 15 minuttar som haldt utan munnbind i matsalen, så det er klart det var seigt mentalt. Det blei ganske mange 100 dagar aleine til slutt.

Fleire slit med søvn

Psykolog Tom Henning Øvrebø gjennomførte nyleg ein studie ved Noregs idrettshøgskole (NIH) av konsekvensane av koronapandemien for toppidrettsutøvarar.

Studien viste at stress, søvnproblem, symptom på depresjon og svekt motivasjon er utbreidd blant utøvarane.

378 toppidrettsutøvarar frå 39 ulike idrettar svarte på undersøkinga, og nesten 40 prosent har hatt søvnvanskar. Samtidig har over 20 prosent hatt symptom på depresjon, og nesten halvparten fortel om negativt stress.

– Nokon spør seg om det er verdt å halde på med idretten når det er så tungt. For enkelte har det også vore tunga på vektskåla for å legge opp, sa Tom Henning Øvrebø då studien blei presentert i mars.

Kan ha bidratt til ein bom ekstra

Han fekk sin første verdscup-siger i 2019. Mange hadde trudd at han skulle ta ytterlegare steg og stabilisere seg enda meir i toppen i sesongen som var, men slik gjekk det ikkje.

– Ein merkar når ein er blid og glad, og har eit bra liv utanom idretten, det er klart at det er lettare å gå i kjellaren i dei tjue minuttane ein skal da, seier Sjåstad Christiansen.

Han fortel at han ikkje likar å skylde på andre enn seg sjølv, men han erkjenner at det har vore tøft mentalt, og i ein idrett som skiskyting er det små marginar som kan skilje suksess frå fiasko.

– Ein skal ikkje sjå bort frå at mangelen på sosial input har bidratt til eit par sekund svakare langrennstider og ein bom ekstra, fortel Sjåstad Christiansen.