NRK-ekspert levde fotballivet i Uruguay: – Kulturen er enorm

– Fotballkulturen er heilt enorm i Uruguay. Det er ingenting anna det er snakk om der. Fotballen er noko dei har inn i seg. Landet si helse blir avgjort på bana, skildrar NRK sin fotballekspert.

Det var i 2003 den då 18 år gamle Carl-Erik Torp valde å ta seg eit år som utvekslingsstudent i Uruguay.

Spelte nesten i toppserien

Faktisk var Torp svært nær å få ein utradisjonell debut i toppfotballen då han fekk vere med i troppen til Deportivo Colonia på øvste nivå to gonger.

– Eg vil tru eg er den einaste nordmannen som har sete på benken i toppserien i Uruguay. Eg minnest at eg varma opp ein heil kamp utan å få kome inn på. Spissen deira frå Argentina var usikker. Om han ikkje hadde blitt klar hadde eg starta, fortel Torp.

Han spelte junior- og litt 3.-divisjonsfotball for KFUM før han reiste til Uruguay. Eigentleg var han lei og skadeplaga før avreisa til Sør-Amerika. Men via kompisar i Uruguay kom han med på juniorlaget til Deportivo Colonia, før han etter kvart trena med a-laget.

Vann vin og kylling

Men det gjekk også mykje i kompisfotball då den seinare Brann-spelaren budde i Uruguay. Laget hans vann fleire turneringar. Premiane var derimot ikkje heilt slik vi kjenner dei frå Norge.

– Som premie for sigeren i ei turnering fekk vi to slakta kyllingar og tre liter heimevin. Det vart ein bra fest etterpå, mimrar Carl-Erik Torp.

I kveld spelar Uruguay åttandedelsfinale i VM mot Portugal. Fotballeksperten Torp føler eg slett ikkje sikker på kven som vinn.

– Hadde vi tatt vekk Ronaldo kunne vi sagt at Uruguay var favorittar. Portugal imponerte heller ikkje mot Iran sist kamp. Uruguay har på si side ikkje sleppt inn mål enno og ser kanskje litt sterkare ut. Men dette er heilt ope, spår Torp.

Ronaldo mot Suarez

Trass i varierande prestasjonar har Portugal 12 strake VM- og EM-kampar utan tap.

Likevel er det Cristiano Ronaldo Portugal-trenar Fernando Santos motvillig må snakke om før åttandedelsfinalen.

– Om Ronaldo spelar åleine kjem vi til å tape. Vi blir nøydde til å vere sterke som eit lag, på akkurat same måte som Uruguay er sterke som eit lag, seier Santos ifølgje Reuters.

Og apropos å ikkje tape: Om vi ser vekk frå bronsefinalen i VM i 2010 har ikkje Uruguay-profilen Luis Suárez tapt éin einaste VM-kamp.

Han handsa på streken i kvartfinalen mot Ghana det året og spelte ikkje semifinalen, der dei rauk ut mot Nederland. Då Uruguay rauk i åttandedelsfinalen mot Colombia i 2014 var Suarez utestengt etter å ha bite Giorgio Chiellini i siste gruppespelkamp.

PS. Uruguay – Portugal ser du på NRK klokka 20.00.