– Vi var rimeleg «shaky». Det var veldig dramatisk. Du blir jo skjelven der og då.
Slik beskriv trenar Atle Karlsen Mortvedt hendinga som skjedde i den sørafrikanske byen Dullstroom. Der har eit heilt lag med norske friidrettstalent vore dei siste tre vekene på treningsleir.
Men på den nest siste natta skulle Andreas Fjell Halvorsen (17) pusse tennene før han skulle leggje seg. Då han såg opp i taket, var det fullt av røyk.
– Ein tenkjer eigentleg berre på å få sagt frå til resten og komme seg ut, seier friidrettsutøvaren som deltok i terreng-EM i desember, til NRK.
– Dei løp ut i boksaren nærast. Dei fekk med seg passa sine, det var det dei rakk å ta med seg. Så løp dei for å varsle meg. Det tok tre minutt. Då var det for seint å gå på rommet, det stod i full fyr, beskriv Mortvedt.
Mista verdifulle eigedelar
Trenaren, som var ansvarleg for gutane på treningsleiren, beskriv ein røyk som berre vart tettare og tettare, så tett og giftig at dei måtte komme seg bort umiddelbart.
– Vi hadde flaks. Eg låg og såg på Idrettsgallaen då gutane hamra på vindauget. Hadde dette skjedd ein halvtime eller tre kvarter seinare då alle hadde sovna, kunne det gått veldig ille, seier Mortvedt.
Hotellet dei budde på heiter Highlander Hotell Dullstroom. Brannen skal ha starta i leilegheita like i nærleiken der dei norske utøvarane budde.
Alle utøvarane kom seg ut i tryggleik utan nemneverdige skadar. Foreldre vart kontakta umiddelbart etter at situasjonen var under kontroll. Ifølge det norske laget skal heller ikkje nokon av dei andre gjestene ha vorte skadd.
Men trenarar og utøvarar mista det meste av eigedelar dei hadde med seg på turen, som mellom anna joggesko, laktatmål og elektroniske utstyr til fleire tusen kroner.
– Det er litt kjipt å miste alle tinga sine. Men det viktigaste er at det gjekk bra med alle, seier Ullensaker Kisa-lauper Andreas Fjell Halvorsen.
– Skummelt
Han var den første til å oppdage brannen, medan Tjalve-lauper Mikkel Bakken (17) var med på å varsle andre lagkameratar og hotellgjester.
– Mikkel skreik at ein måtte ta med seg pass. Alle fekk med seg pass og sprang ut, seier Halvorsen.
Bakken fortel at hendinga er noko som har prega dei og som dei snakkar mykje om.
– Det var ganske skummelt der og då. Det viktigaste var å komme i tryggleik, men vi opplevde det som ganske alvorleg då, seier han til NRK.
Trenar Mortvedt fortel at dei vart overlatne heilt til seg sjølv, og at brannvesenet ikkje hadde komme då den norske leiren drog frå hotellet. Heldigvis var det fleire norske friidrettsutøvarar i byen.
– Vi overnatta hos dei på nokre sofaer. Så fekk vi låne treningsutstyr og fekk til og med ein god økt dagen etterpå, seier Bakken.
Måndag ventar ein lang flytur frå Johannesburg til Oslo.
– Det var rart å skulle pakke på veg heim og berre eige ein plastpose med ting. Det var spesielt, men gutane tek det bra. Vi var heldig at det gjekk bra med alle, det var det viktigaste, seier Bakken.