Moen har lenge vore eit av landets største løpstalent. I 2011 tok han gull i U23-EM på 10.000 meter. Nå satsar han alt på maraton fram mot OL i Rio neste år. Men det er ikkje berre enkelt.
– Nå har eg venta seks veker på å få svar på kva OL-kravet skal vere. Eg synest det verkeleg er uprofesjonelt, seier Moen på telefon til NRK frå Kenya.
Der er trønderen på høgdesamling i landsbyen Iten på 2400 meters høgde. Medan resten av landets friidrettsutøvarar så smått har begynt førebuinga til neste sesong, ladar Nordstad Moen framleis igjen til sesongens viktigaste mål.
I Firenze 29. november jaktar 24-åringen OL-kravet han framleis ikkje veit kva er.
– Det verkar jo som om dei ikkje vil ha med utøvarar til OL.
Har bruka alt for lang tid
Hanne Haugland er coach i Olympiatoppen med ansvar for friidrett. Ho seier til NRK at Olympiatoppen framleis jobbar med å utarbeide krava.
– Det er sjanse til topp 12 som er bakteppet. Da må det gjerast ein grundig jobb med å dykke ned i alle resultat som tidlegare har gjeve topp 12-plassering for å finne ut kva slags tider og lengder som skal gje direkte kvalifisering til OL, seier Haugland.
Haugland fortel at dei framleis ventar på eit par innspel frå personar i friidrettsmiljøet før krava blir offentleggjort. Desse har fått frist til over helga. Derfor må nok Sondre Nordstad Moen vente enda lenger før han veit kva han må prestere i Firenze.
Det blir Nordstad Moen frustrert over å høyre.
– Dei har bruka alt for lang tid. Det her burde dei ha klart på ein kaffekopp og fem minutt, seier 24-åringen som trur kravet vil lande på 2.12.
Og sjølv om han då må prestere ei tid som er fem minutt sterkare enn det internasjonale kravet, synest han ikkje det er urettferdig.
– Det er der det bør ligge. Ein løpar som spring på 2.16 har ingenting i eit OL å gjere. Eg har trent for å springe på 2.11 og meiner det skal vere realistisk.
Trønderen har aldri springe ein heil maraton før, men har ein pers så god som 1.02.35 på halvmaraton. Det gjer han trygg på at OL-kravet på maraton er innan rekkjevidde.
– Både persen og forma eg er i tilseier at det skal vere mogleg. Eg sprang ein halvmaraton i England for nokre veker sidan på 1.03.09. Då var eg midt i treningsperioden og hadde ikkje lada spesielt opp. Det var oppløftande.