Noregs forvandling forbløffar: – Beste nokon gong

Ingen slår dei norske jentene for tida. Dei norske skiskyttarkvinnene har ikkje vore utanfor pallen på stafett sidan 2018. Det overraskar skiskyttarekspert Ola Lunde.

Tiril Eckhoff klarte å dra i land sigeren med god skyting på siste ståande. Franske Braisaz og svenske Øberg måtte bruke fleire ekstraskot enn skiskyttaren frå Fossum.

I 2016 fekk Marte Olsbu Røiseland ankeretappen på landslaget under VM på heimebane. Mange vart overraska av det, men endå fleire vart imponerte då ho svarte på tilliten ved å gå Noreg inn til eit overraskande VM-gull i Holmenkollen. Det var kvinnelagets første pallplass på stafett på to år.

No er situasjonen heilt annleis. Dagens siger i Oberhof var langt mindre overraskande når dei norske skiskyttarkvinnene gjekk inn til sin fjerde strake siger. Det siste året har dei aldri vore dårlegare enn nummer to.

– Dette er det beste som har vore nokon gong i skiskyting på damesida. Det er rett og slett ei forvandling samanlikna med det dei har gjort tidlegare. Me har tre kvinner som er heilt i toppen av verdscupen, men me har også andre gode stafettløparar også, seier NRKs skiskyttarekspert Ola Lunde, som innrømmer at han er litt overraska over dei gode resultata.

– Like gode som gutane

Lunde meiner god og tett oppfølging frå trenarar er nøkkelen til suksess. Også dagens ankerkvinne Tiril Eckhoff takkar dei ho har rundt seg.

– Eg er veldig stolt over å ha vore med på å bygge opp det laget her. Ein stor takk til smørjarar og trenarar og heile gjengen som bygger opp resultat på lik linje som gutane, seier Eckhoff.

Skiskyttarjentene har alltid vore litt i skuggen til dei gode resultata til herrelandslaget. No meiner Eckhoff at kvinnene er minst like gode.

– No kan me seie at me er like gode som gutane. Tenk på det! Endeleg.

Tiril Eckhoff hadde teke over ansvaret som ankerkvinne frå Marte Olsbu Røiseland på dagens stafett, og ho leverte ein strålande sisteetappe i hard konkurranse med Frankrike og Sverige. Laga kom likt inn til siste skyting, men ut frå standplass var Eckhoff åleine i tet.

Resultatet er Noregs fjerde strake siger i verdscupen, og det norske kvinnelandslaget har aldri vore betre.

Mens Liv Grete Skjelbreid, Linda Grubben og Tora Berger veksla på å vere Noregs beste kvinne, så har Marte Olsbu Røiseland, Tiril Eckhoff og Ingrid Landmark Tandrevold alle levert resultat i verdstoppen på same tid. Det har resultert i gode stafettar, men også mange topplasseringar i individuelle renn.

Eckhoff er no nummer to i verdscupen samanlagd, Tandrevold nummer tre, mens Røiseland har falt ned til ein 12.-plass etter at ho stod over renna i franske Le Grand Bornand.

– Berre til å leike seg

Eckhoff hadde tatt over ansvaret som Røiseland har brukt å ha, og viste at Noreg har fleire ankerkvinner dei kan stole på. Røiseland gjekk Noreg opp i tet på sin tredje etappe, og sendte Eckhoff ut med ei knapp leiing.

– Det var veldig spennande. Eg er veldig godt nøgd med etappen min. Brukte kanskje eit for mykje ekstraskot, men det var herleg å kunne gje Tirill eit godt utgangspunkt, sa Røiseland etter etappen sin.

– Håper Tiril tek seg tid til å nyte det, og no er det berre til å leike seg med konkurrentane, sa den erfarne ankerkvinna.

Og det var nettopp det Eckhoff gjorde. Ho nøya seg med eit ekstraskot på siste skyting, mens svenske Hanna Øberg og franske Justine Braisaz måtte bruke fleire ekstraskot. Eckhoff gjekk ut frå siste skyting med sju sekund ned til Øberg. Avstanden berre auka ut på siste etappe i dei isete løypene i Oberhof, og Eckhoff kunne gå i mål til Noregs tredje stafettsiger denne sesongen av tre moglege.

– Det er rått, og me har ein skikkeleg bra lagkultur, sa den eldste på laget, Synnøve Solemdal etter målgang.

Ho leverte sjølv ein god etappe, trass tre ekstraskot på første etappe.

– Eg er stolt av laget i dag, sa Røiseland etter målgang, og viste til at det var dårlege skytetilhøve i Oberhof i dag, men at Noreg klarte å unngå strafferunden.

God innsats av Tandrevold og Solemdal

Sveits har overraska på stafettane tidlegare denne sesongen, og låg lenge veldig bra an i dagens stafett. Med ein strafferunde på Aita Gasparin på tredje etappe førte sveitsarane langt ned på lista, og dei enda til slutt på femteplass.

Synnøve Solemdal starta for Noreg og trass litt trøbbel på ståande skyting klarte ho å henge med i løypa og veksla på ein åttande plass. Også Ingrid Landmark Tandrevold fekk tre bom på sin andreetappe, og ho tapte fleire sekund til teten på andre etappe. Likevel gjekk ho Noreg opp til ein sjetteplass.

Marte Olsbu Røiseland gjekk ein strålande etappe i den snøfattige løypa i Oberhof. Ho måtte tole to bom på ståande skyting, men gjekk Noreg opp i leiing på sisterunden og sende Eckhoff ut i tet.

Den leiinga tok Eckhoff godt vare på, og ho auka leiinga ned til Sverige på andreplass på sisterunden. Frankrike fekk tredjeplass, mens Tyskland klatra seg opp til ein fjerdeplass.

Sidan januar i fjor har det norske laget teke fire verdscupsigrar i stafett, og dei har aldri vore dårlegare enn nummer to. Det står i sterk kontrast til resultata det norske kvinnelandslaget brukte å ha på stafett.

Då Noreg vann eit overraskande VM-gull i stafett i 2016 hadde dei ikkje vore på pallen på to år. No er alt snudd opp ned, og Noreg har altså ikkje vore utanfor pallen på over eit år.

Laster innhold, vennligst vent..

Siste nytt

  • Hovland fire slag bak i Dubai

    Viktor Hovland åpnet Dubai Desert Classic med en runde ett slag under par i vanskelige spilleforhold. Han er på delt 18.-plass etter de første 18 hullene, og er fire slag bak ledende Thomas Pieters. Turneringen i Dubai inngår i europatouren og varer til søndag. Forrige uke slet Hovland i sin sesongdebut. Da klarte han ikke cuten i Abu Dhabi. (NTB)

    Viktor Hovland spiller turnering i Dubai
    Foto: Stian Lysberg Solum / NTB scanpix
  • Sørloth til kvartfinale

    Klubben til Alexander Sørloth, Trabzonspor, er videre til kvartfinale i den Tyrkiske cupen etter straffesparkkonkurranse. I det første oppgjøret mot Denizlispor vant klubben til Sørloth 2-0, men fikk det langt tøffere torsdag. Denizlispor skaffet seg en tidlig 2-0 ledelse, men i andreomgang fikk nordmannen muligheten fra straffemerket. Den reddet keeper og det stod 2-0 til Denizlispor etter full tid. Dermed måtte kampen avgjøres på straffesparkkonkurranse, og der var Trabzonspor best. Sørloth spilte hele kampen, men tok ikke en av de avgjørende straffene.

    Alexander Sørloth spilte hele kampen
    Foto: Stian Lysberg Solum / NTB scanpix
  • Thingnes Bø vant i «comebacket»

    Johannes Thingnes Bø skjøt 20 treff og vant torsdagens 20 km i Pokljuka. Rennet var hans første i 2020, og hans første etter at han ble pappa til en gutt. Nordmannen var 11,4 sekunder raskere enn Martin Fourcade og 25,6 raskere enn Fabien Claude.

    Johannes Thingnes Bø under torsdagens normaldistanse i Pokljuka
    Foto: Darko Bandic / AP

Sendeplan

Kl. Program Kanal