– Eg ville gått OL dersom eg fekk gjere det under russisk flagg, eller dersom eg blei invitert. Men eg vil ikkje søkje IOC om å få gå i Korea, seier Krjukov til nettstaden sports.ru.
– Eg er ikkje klar for å gå under nøytralt flagg.
I desember nekta IOC Russland å delta i OL på vanleg måte, som straff for det som den såkalla Schmid-rapporten meinte beviste statleg styrt dopingjuks i Sotsji-OL.
Men IOC vedtok samstundes å invitere russiske utøvarar som ikkje har vore involverte i dopingmistankar. Desse skal delta under nøytralt flagg, og den russiske nasjonalsongen skal ikkje spelast.
Krjukov tok saman med Sergej Ustjugov gull i lagsprinten i VM i Lahti i fjor. Men denne sesongen har han berre gått eitt – sprinten på Lillehammer, der han blei nummer 42.
Sjå innspurten i lagkonkurransen i Lahti-VM her:
– Motivert til å slå OL-vinnarane
Han fortel at han har orientert resten av det russiske langrennslandslaget om sitt standpunkt.
– Eg forklarte at dette var mitt personlege standpunkt og mi personlege meining. Eg vil ikkje presse den på nokon annan, seier Krjukov, som seier han har fått mykje støtte på sosiale media.
– Skal du følgje OL i Pyeongchang?
– For å vere heilt ærleg kjem eg ikkje til å sjå på. For meg er ikkje dei olympiske leikane slik dei skal vere. I staden vil eg prøve å førebu meg til neste meisterskap, og eg er svært motivert for å slå dei som blir olympiske meistrar i Korea, seier Krjukov.
Tidlegare har skøyteløpar Olga Graf sagt at ho ikkje vil gå i OL under nøytralt flagg.
Etter CAS-dommen i går, der utestenginga av 28 russiske OL-utøvarar blei oppheva, krev Russland at 15 av dei må bli inviterte til OL. Men Krjukovs namn står ikkje på den lista, ifølgje sputniknews.com.