–«Det kittlar lite med Norge», opnar programleiaren i SVTs fotballstudio med.
Sverige slo Moldova i sin siste kvalifiseringskamp i går kveld, men må ut i playoff for å kvalifisere seg til EM i Frankrike. Og akkurat det var det store temaet i SVTs studio i går kveld. Der var tidlegare Stabæk-storskårar Daniel Nannskog på plass og han er langt frå einig med det programleiaren legg fram.
Vil helst møte Noreg
– Eg likar ikkje at spelarane går ut og seier dei vil møte Noreg. Det er ikkje ein drøymemotstandar slik eg ser det, sa Nannskog som er fotballekspert for den svenske kringkastaren.
For etter 2-0 sigeren over Moldova i går, svarte fleire av dei svenske spelarane at dei håpar å møte Noreg i dei to avgjerande kampane for å nå EM-sluttspelet neste sommar, om me ikkje slår Italia og kvalifiserer oss direkte i kveld.
– Det hadde vore kult å møte Norge, sa Martin Olsson til Expressen.
– Eg vil helst møte Noreg, var Erkan Zengin like klar på til same avis.
Til og med prins Carl Philip ser på nabolandet som drøymemotstandaren.
– Det hadde vore spennande å sjå Sverige mot Noreg i playoff. Da må me vinne, sa prinsen til Expressen.
– Noreg er i kjempeslag
Men der trur Nannskog at både spelarar og kongelege er alt for kjepphøge. Mannen med 101 mål for Stabæk ser eit norsk lag som er langt betre enn det han såg da han var aktiv.
– Noreg er på veg oppover. Dei har mange unge spelarar og har vore i veldig bra slag den siste perioden. Du må hugse at dei slo Kroatia som er eit veldig sterkt lag med 2-0. Ein er verkeleg sulten på å nå eit sluttspel der nå og det norske landslaget er eit lag eg har stor tru på i framtida.
Nannskog trur det blir ein svært tøff kamp mot Italia i Roma i kveld, men utelukker ikkje at hans andre "heimland" kan ha sjanse på siger.
– Det finst moglegheiter mot Italia. Italia er EM-klare og me veit at Italia kan ta det litt piano.
– Men det er fordel Sverige om me møter dei i playoff, spør programleiaren.
– Noreg i playoff, eg likar ikkje det. Det er fordel Sverige på grunn av Zlatan, men det føles ubehageleg. Dei er verkeleg eit lag som jobbar godt saman, svarte Nannskog.