– Mange må håpe på «berre» 2-0-tap i Molde

– Det er lettare å leve med slik tap enn heime mot Viking sist. Sist var vi like gode, i dag møter vi Noregs beste lag. Molde er veldig gode!, opna Mjelde til C More like etter kampslutt.

Start var aldri nære poeng på Aker Stadion. Ein god Håkon Opdal i bortelaget sitt mål hindra stygge siffer.

– Dei har to «slike» lag dei kan sette utpå, all ære til dei. Det har enormt av kvalitet å ta av, for det handlar om kvalitet. Opdal reddar oss frå meir enn 2–0. Det er mange som må håpe på det – å tape «berre» 2–0 i Molde, meinte Opdal.

Tok over tabelltoppen

I ein heller sjansefattig kamp var det to dødballar som blei avgjerande for eit gulljagande Molde.

Mohamed Elyounoussi serverte til goalgetter Fredrik Gulbrandsen like før pause, før ein ny Elyounoussi-dødball like etter pause enda i sjølvmål til 2–0.

Då toppscorar i eliteserien, Vidar Örn Kjartansson, fann nettmaskane to gonger for Vålerenga mot Strømsgodset, tok Molde over tabelltoppen i eliteserien.

Godset leia eitt poeng føre Molde før sjette serierunde.

– Det er heilt fint det, repliserte Molde-trenar Tor Ole Skullerud på spørsmål om det var «ålreit å vere øvst».

Straffe? Straffe? Mål!

Start yppa seg tidvis i første omgang, men Molde såg ut til å ha god kontroll – sjølv om sjansane ikkje var mange.

Fredrik Gulbrandsen var nære ved å sette inn 1–0 etter seks minutt etter å ha blitt spelt gjennom, men ballen sneik seg utanfor Start-stolpen.

Ikkje før dei siste fem minutta av omgangen kom det store moglegheiter igjen. Først var Harmeet Singh nære etter 40 minutt, før heile Aker Stadion reiste seg tre minutt seinare.

Molde skulle nemleg fort hatt straffe to gonger – rett etter kvarandre: Først blei Daniel Chima Chukwu hekta inne i 16-meteren, før Gulbrandsen blei felt nede i høgre hjørne av 16-meteren like etter.

Dommaren vinka, feilaktig, vidare etter første situasjon, før det blei «berre» frispark i situasjon nummer to.

Det etterfølgjande frisparket sikra derimot 1–0. Elyounoussi serverte lågt på første stolpe, der Gulbrandsen på frekt vis breisida ballen i mål.

– Den er unødvendig. Det spelar inga rolle om det kanskje er straffe før frisparket. Unødvendig var det uansett, sa Start-kaptein Håkon Opdal til C More i pausen.

– Det var forløysande med scoringa. Vi skapte sjansar både tidleg og seint, sa Molde-keeper Ørjan Håskjold Nyland.

Bismak for Bismark

Etter pause kom Daniel Berg Hestad inn for Molde og tok over kapteinsbandet frå Håskjold Nyland. Start gjorde ingen bytte, men var litt betre med i kampen dei første minutta.

Men så enda ballen på ny i nettet bak Opdal.

Eit frispark skrått frå om lag 25 meter blei servert av Elyounoussi. I feltet var Chima Chukwu først på, men ballen var på veg utanfor. Ein uheldig Bismark Acosta styrte derimot ballen i eige mål til 2–0.

Utover i omgangen var Molde nære 3–0 ved fleire høve, og berre ein god keeper Opdal i Start-målet hindra stygge siffer i Molde.

«Toro»: – Dette var solid

Molde-trenar Tor Ole Skullerud var ikkje fornøgd med opninga på kampen. Frå 20. minutt og ut var derimot alt sol og smil.

– Dette var solid. Fortent at vi vann, opna han til C More.

– Vi er klart best. Det er bra balltempo, godt angrepsspel og vi kunne scora fleire i dag, meinte «Toro».

Molde står med tre sigrar på heimebane. Berre tap 2–1 borte mot Odd i andre serierunde hindrar full pott etter seks serierundar.