Meiner treningsforholda i VM er uakseptable – trur ikkje det ville skjedd i eit herre-VM

Landslagssjef Thorir Hergeirsson fortvilar over treningsforholda under VM i Spania. Han fortel om treningshallar med «ruglete betonggolv» og nektar spelarane sine å trene der. Det internasjonale handballforbundet (IHF) lovar betring.

Thorir Hergeirsson og Nora Mørk

PROTESTERTE: Thorir Hergeirsson gjekk ikkje med på å trene i ein handballhall med betonggolv og gav klar tilbakemelding til IHF og arrangøren.

Foto: Beate Oma Dahle / NTB

– Treningshallane dei har tilbode oss er ikkje ein verdsmeisterskap for kvinner verdig. Det er ruglete betonggolv med to–tre millimeter linoleumsduk oppå, fortel landslagssjefen til NRK på pressetreffet på laurdag.

Noreg knuste Kasakhstan i opningskampen fredag kveld, utan å ha vore optimalt førebudd. Landslagssjefen ville ikkje la spelarane sine trene i treningshallane dei hadde fått tildelt frå arrangøren og IHF.

– Det er uakseptabelt. Så vi har avstått frå det. Det har òg Romania gjort og fleire andre lag her, seier Hergeirsson.

Håndball kvinner, privatlandskamp Frankrike - Norge

LITE HANDBALLTRENING: Nora Mørk (t.v.) og Stine Bredal Oftedal har måtta trene mykje alternativt etter at dei kom til Spania.

Foto: Stéphane Pillaud / NTB

Meiner det ikkje ville skjedd i eit herre-VM

Han fortel at dei har gitt klar beskjed til IHF og arrangøren om misnøya med treningsfasilitetane, og at forbundet har beklaga og jobbar med å løyse problemet. Etter at dei sa frå har Noreg fått tildelt treningstid i kamphallen laurdag.

Likevel er ikkje landslagssjefen spesielt imponert over at det ikkje var lagt betre til rette i ein verdsmeisterskap.

– Det er ein tankevekkjar for IHF. Eg trur aldri dei hadde gitt eit slikt tilbod til eit herrelag i eit herre-VM, seier han.

Thorir Hergeirsson

KRITISK: Thorir Hergeirsson trur ikkje noko liknande ville skjedd i eit herre-VM.

Foto: Beate Oma Dahle / NTB

NRK har sendt kritikken til IHF. Talspersonen deira, Jessica Rockstroh, forklarer at forbundet er klar over problemet etter å ha fått tilbakemeldingar frå fleire av laga om treningsforholda.

– Treningsarenaen blir jamleg brukt til lokale handballaktivitetar, men vi reagerer sjølvsagt dersom spelarane ikkje er nøgde, då vi ønskjer at dei skal ha best moglege forhold. Vi ser etter alternative løysingar, skriv ho.

I ein ny e-post fortel ho at IHF nettopp har klart å skaffe ein ny treningshall med treparkett som forbundet har fått godkjent.

Ønskjer seg fleire håndballøkter for Romania-kampen

Ei som truleg er veldig fornøgd med det, er Nora Mørk. Ho var kritisk til at dei ikkje hadde fått trent meir handball før opningskampen.

Vi har hatt utruleg lite handball. Det er ei veke sidan vi spelte kamp mot Russland i Bergen, så vi skulle gjerne hatt litt meir handball spesielt no den første veka der det er så enkle kampar, slik at vi hadde stilt endå betre mot Romania tysdag, sa Mørk til NRK etter Kasakhstan-kampen.

Kaptein Stine Bredal Oftedal var ikkje like bekymra, og seier at mykje kan gjerast med videoanalyse og trening utanfor hall.

– Sjølvsagt ville vi hatt eit par håndballøkter til, men det er mykje handball generelt òg. Så nokre gonger er det kanskje lurt å gå ned på belastning uansett, seier ho.

Siste nytt

  • Kalla dommaren ein «liten katt»

    Det blir Daniil Medvedev som skal møte Rafael Nadal i finalen i Australian Open søndag. Russaren slo greske Stefanos Tsitsipas 7–6 (7/5), 4-6, 6-4, 6–1.

    Medvedev sleit i dei to første setta, men styrte kampen mot slutten.

    Medvedev vikla seg også inn i ein krangel med dommaren og kalla han ein «liten katt». Russaren meinte Tsitsipas fekk for mykje råd og tilrop frå far sin på tribunen under kampen. Det er ikkje lov, og Tsitsipas fekk også åtvaring for det.

    Daniil Medvedev
    Foto: AARON FRANCIS / AFP
  • EM-gull til Bjøntegaard

    Erlend Bjøntegaard (31) skaut feilfritt og tok gullet på 10 kilometer sprint i skiskyttar-EM i Tyskland fredag.

    Nordmannen vant med 20 sekund ned til andremann, russiske Nikita Porsjnev.

    Bjøntegaard var ikkje den raskaste i sporet fredag, men tok inn det tapte på skytebanen. Ut frå første skyting var han 14 sekund bak leiaren, men ut frå siste skyting leidde han med 16 sekund til Porsjnev. Det forspranget gav han ikkje frå seg, og dermed blei det gull.

    Sverre Dahlen Aspenes, Håvard Gutubø Bogetveit og Johannes Dale vart alle blant dei ti beste. Dei pådrog seg to strafferundar kvar, og Aspenes vart nummer sju, medan Bogetveit og Dale tok plassane rett bak han.

    Sesongstart Skiskyting
    Foto: Geir Olsen / NTB
  • Tande og Forfang rekk truleg OL

    Skihopparane Daniel-André Tande og Johann André Forfang nærmar seg CT-verdiane som krevjast for å kunne delta i OL i Kina.

    Det fortel landslagstrenar Alexander Stöckl til NTB fredag formiddag. Tande og Forfang har vore koronasmitta og er i prosessen med å teste seg klar for OL.

    – Heldigvis er det ikkje nokon fleire positive. De tre som er heime (Tande, Forfang og Fredrik Willumstad), køyrer testregime med dagleg testing for å sjå når de bikkar over den berømte CT-verdien på 35.

    Kvalifiseringa til det første OL-rennet i Beijing går laurdag i neste veke. Tande og Forfang må levere den første negative koronatesten seinast fem dagar før avreise til Kina, og deretter må de ha ytterlegare tre godkjente prøver før de kan sette seg på OL-flyet.

    Tande og Forfang
    Foto: Geir Olsen / NTB

Sendeplan

Kl. Program Kanal