Meiner Ødegaard har ei «ukjend» side

– Det er mykje ein ikkje ser utanfor dei fire veggene, seier Marcus Næslund Haugland.

Haugland har vore god kamerat med Ødegaard heilt sidan barnehagealder. Dei spelte fotball saman på den etter kvart velkjende Kjappen-banen i Drammen, og lenge var dei òg på same lag.

Biletet ovanfor er av Strømsgodsets G16-lag i 2012.

Då 14 år gamle Ødegaard var «alltid» litt yngre enn lagkameratane sine. Det er naturlegvis noko av grunnen til at Ødegaard ikkje fekk mange kampar som kaptein i ungdomsfotballen.

– Folk får eit anna inntrykk

Haugland vart overraska over at Ødegaard vart utnemnt til landslagskaptein allereie no, men ikkje på grunn av leiareigenskapane hans.

Sjølv om Ødegaard gjerne er lågmælt i møte med pressa, tek han langt større plass i ein garderobe, fortel Haugland.

– I media kan han oppfattast som ein som ikkje tek så mykje plass og ikkje er så verbal, men i ein garderobe tek han alltid plass og seier det han meiner. Han har leiareigenskapar som kanskje folk ikkje har sett og oppfatta. Han er jo ein veldig roleg og jordnær type, så folk får nok eit anna inntrykk. Men han tek ansvar, seier Haugland.

Barndomskameraten trur Ødegaard vil leie i kraft av statusen hans på landslaget, og han trekkjer fram at 22-åringen er reflektert og vaksen til å vere så ung.

Samtidig kan han altså setje skapet på plass.

– Han seier frå på ein konstruktiv måte. Viss han ikkje er fornøgd, set han seg ikkje ned og lyttar. Han kjem med meininga si, seier Haugland.

– Naturleg autoritet

Harald Johannessen var dåverande trenar for G16-laget og leiar av det såkalla Ungt Løft-prosjektet. I dag er han utviklingssjef i Strømsgodset, og han har følgt Ødegaard tett heile karrieren.

Johannessen seier at dei gav spelarane ulike utfordringar i løpet av prosjektet, og det er òg grunnen til Ødegaards kapteinsframferd.

– Grunnen til at det finst få bilete av Ødegaard som kaptein, er fordi han alltid var yngst, seier Johannessen.

Han beskriv leiarevna til Ødegaard som «typisk norsk».

– Han får med seg alle på ein veldig bra måte utan å heve stemma, men krava er der, seier Johannessen.

Godset-leiaren trekkjer ein parallell til Jørgen Strand Larsens erfaringar i Groningen.

Spissen fortalde til Nettavisen at han ofte har fått tips om å halde seg på blindsida av stopparane, men det gjorde først ordentleg inntrykk då Arjen Robben sa det.

– Når Ødegaard speler i Real Madrid og Arsenal, får han ein så naturleg autoritet. Du treng ikkje heve stemma. Du veit verkeleg kva toppnivå er, og kva som krevjast, seier Johannessen.

Fann alltid svakheitene

Hallvard Håskjold hugsar ikkje den aktuelle kampen på Notodden i 2012, men han hugsar Ødegaard som ein naturleg leiar sjølv om han var yngst.

Håskjold er to år eldre.

– Det verka ikkje som om han var yngre. Både på grunn av det han gjorde på banen, og òg at han heile tida kom med innspel. Då Martin snakka, lytta ein. Då visste ein at det kom noko nyttig, seier Håskjold.

Den no utdanna advokaten trur Ødegaard tilnærmar seg garderoben på same måte som han gjorde i midten av tenåra: Fagleg og presis.

– Han er ikkje han ein høyrer mest eller gjer mest ut av seg. Han klovnar ikkje så mykje rundt. Men han seier frå der det trengst, der det er forbetringspotensial. Han har alltid hatt gode innspel, og eg trur ikkje det har endra seg med åra, seier Håskjold.

Håskjold snakkar med NRK rett etter at Ødegaard storspelte mot West Ham søndag ettermiddag.

Igjen var nordmannen arkitekten. Ødegaard kontrollerte midtbanen og var tredje sist på alle måla til Arsenal.

Fotballforståinga var minst like imponerande som det tekniske òg i ung alder.

– Viss vi hadde dårlege kampar, synest eg alltid at han sette fingeren på nøyaktig kva vi måtte gjere annleis, seier Håskjold.

– Han var han blant oss som var lengst framme òg på analyse og taktikk. Det ser du når han speler. Fotballforståinga er heilt sjuk, og det klarer han òg å formidle med ord, seier Håskjold.