– Eg trur eg er den mest fornøgde fjerdeplass-vinnar i OL i Sotsji, og det var utruleg gøy at Ola, Maiken og Ingvild gjorde det så bra, seier ho i ei pressemelding.
Då Maiken Caspersen Falla og Ingvild Flugstad Østberg tok gull og sølv, blei Astrid Uhrenholdt Jacobsen nummer fire på OL-sprinten tysdag. Ho brekte derimot staven.
– Den brekte staven kan ha vore det som stod mellom meg og ein medalje på sprinten. Men ein tapt medalje er ikkje så viktig i dag, fortel 27-åringen.
– For meg var det ein siger å gå og mobilisere krefter for å prestere i skisporet, seier Uhrenholdt Jacobsen vidare.
Det var fredag førre veke at ho fekk den tunge meldinga om at broren var død.
- Les også:
Lagvenninnene tok til tårene
Etter opningsrennet laurdag, då Marit Bjørgen tok gull og Heidi Weng tok bronse, tok kjenslene overhand for lagvenninnene til Uhrenholdt Jacobsen.
– I dag betyr idrett ingenting. Ein får litt perspektiv for ting, sa Bjørgen etter gullet.
Under skiathlonet laurdag gjekk Bjørgen, Weng, Therese Johaug og Kristin Størmer Steira i tillegg med sørgeband.
- Les også:
Bjørgen: – Rørande å tenkje på
Sprinten tysdag skulle uansett bli Uhrenholdt Jacobsen sitt første renn under OL, og både ekspertar og utøvarar var imponerte då ho tok seg vidare til kvartfinale. Etter sprinten var det mange som imponerte over innsatsen til 27-åringen.
– Ho har vore veldig sterk. Ho hadde veldig lyst til å gå bra. Og at ho klarte å mobilisere og gjere det så bra, er imponerande, sa Marit Bjørgen.
– Det er rørande å tenkje på det ho har vore gjennom. Eg trur det har vore ei frisone for henne å trene og konkurrere, heldt Bjørgen fram til NRK.
Dario Cologna, som vann skiathlonet søndag, meiner det står enorm respekt av det Uhrenholdt Jacobsen fekk til tysdag.
– Det er heilt fantastisk det ho gjer. Det er veldig sterkt, og det hadde vore veldig moro om ho gjekk inn til medalje, sa sveitsaren då Uhrenholdt Jacobsen blei klar for semifinale.