– Håvard har meldt seg på i EM, slo NRKs kommentator Even Wetten fast etter at Loretnzen også hadde teke tredjeplassen på 1000-meteren fredag kveld.
– Vi hadde tru på at han skulle blande seg inn i topp fem. No er han topp tre, seier Wetten.
Fana-løparen gjekk i par med sterke Kai Verbij. Ved inngangen til siste sving såg det ut som om Lorentzen skulle knekke den sterke nederlendaren, men det heldt ikkje heilt, og han blei slått med 22 hundredelar.
– Håvard leverer som han har gjort heile sesongen, og det er vel fortent at han er med i medaljekampen.
– Eg er veldig nøgd med to gode løp. Men det er jamnt, seier Håvard Holmefjord Lorentzen til NRK.
0,29 sekund bak leiaren
Verbij leier sprint-EM etter første dag, med Nico Ihle på andreplass. Lorentzen ligg 0,29 500 m-sekund bak Verbij.
På 500-meteren blei Lorentzen nummer seks, men med parsiger over ein annan sterk nederlendar, Kjeld Nuis.
– Det håpar eg å gjere i morgon også. Han er litt betre enn meg på 1000, så det hadde vor godt å ha litt meir å gå på, seier Lorentzen.
– Pallplass er mogeleg, men eg må levere to gode løp i morgon også. Det blir i så fall det største eg har opplevd som skøyteløpar, seier Lorentzen, som fekk førre sesong øydelagd av ein stygg skade.
Stabil
– Kan det halde heilt inn?
– Det er eit sjansespel, seier Even Wetten.
– Kjeld Nuis på fjerdeplass gjorde ein stor feil på 500 i dag. Det er ikkje sikkert han gjer det på neste 500, og han kan bli vanskeleg. Men alle kan feile, og Håvard er veldig stabil.
Norges andre deltakar i tidenes første sprint-EM er Espen Aarnes Hvammen. Han er nummer 9 i samandraget, etter 10.-plass på begge distansane fredag.
Sprintarane avsluttar sitt EM med 500 og 1000 meter også laurdag.