– Det er lurt at eit nytt OL er eit prosjekt for idretten i heile Norge, seier Lillehammer-ordførar Espen Granberg Johnsen til VG.
Lillehammer har fått utarbeidd ein ekstern rapport med sterke og svake sider for ein eventuell søknad om vinter-OL i 2026 eller 2030. I førre veke vedtok Lillehammer å gå vidare med planene.
Der går det fram at også Oslo, Bergen, Trondheim og Stavanger kan få enkelte øvingar, som ishockey- og curlingkampar.
– Initiativet er veldig bra, seier IOC-medlem Gerhard Heiberg, som har vore i kontakt med Lillehammer om ideen.
Heiberg seier at IOCs Agenda2020 gir høve til meir fleksible løysingar for OL-arrangementa enn tidlegare.
Idrettspresident Tom Tvedt er også kjend med planene, men er noko reservert.
– Eg regristrerer ingen underskog av folk i idretten som ropar på eit stort initiativ. Søknadsprosessane i tilknytning til Tromsø og Oslo var tøffe for idretten, seier Tvedt til VG.
Det er berre to og eit halvt år sidan Oslos søknad om OL i 2022 havarerte på grunn av manglande statsstønad.
– Det kan kanskje provosere nokon. Men vi må likevel kunne diskutere nye sjansar for eit OL i Norge. Alle kjenner suksessen med OL i 1994 og ungdoms-OL i fjor, seier Heiberg, som går av som IOC-medlem til hausten.