Landslaget skal møte San Marino borte i morgon og Nord-Irland heime søndag.
Norge er storfavoritt mot San Marino torsdag, men Lagerbäck åtvara sterkt mot å ta for lett på oppgåva.
– Tempo og tolmod blir nøkkelen, seier landslagssjefen.
Han meinte forsvaret har blitt betre i kampane han har leia sidan den første mot Nord-Irland i Belfast i mars.
– Bortsett frå mot Tyskland. Då spela vi som eit handballag, sa Lagerbäck om 0-6-kampen i Stuttgart for ein månad sidan.
Nations League: – Skulle vore ein divisjon høgare
– Det er viktig at vi vinn alle kampane, fordi det gir oss betre ranking i UEFA Nations League, sa Lars Lagerbäck på pressekonferansen dagen før VM-kvalifiseringskampen mot San Marino.
UEFA Nations League er ein nyskaping som blir sjøsett neste haust. Men allereie i neste veke, etter dei avsluttande VM-kvalifiseringskampane, blir divisjon og seedingsnivå avgjort.
– Det er ei ulempe å hamne i ei altfor lett gruppe. Vi skulle vore ein divisjon høgare for å få betre matching, sa Lagerbäck.
Nations League er eit ligasystem for alle UEFAs 55 medlemsland. Ligaen er delt i fire divisjonar, kvar divisjon med tre eller fire seedingsnivå.
Færre privatkampar
Det er allereie klart at Norge vil spele på nivå 3 i den første utgåva av Nations League. Men resultata mot San Marino og Nord-Irland avgjer kva seedingsnivå innanfor den divisjonen Norge hamnar på.
Uansett vil den nye ligaen avgrense sjansane for å spele privatlandskampar frå neste haust. Derfor har Lars Lagerbäck eit litt splitta syn på National League.
– Sportsleg er det alltid godt med konkurransekampar. Men vi skulle gjerne hatt kampar mot litt betre motstand enn på tredje nivå i Europa.
Kampane mot San Marino og Nord-Irland er så langt dei siste på NFFs kalender i år. Men Lagerbäck opplyste at dei jobbar med å få på plass motstandarar til to kampar på dei internasjonale datoane rundt andre helga i november.
– Vi jobbar med ulike motstandarar, men det er enno uvisst kven som skal ut i playoff i VM-kvalifiseringa dei dagane. Det blir meir avklart i neste veke, sa landslagssjefen.