– Det var ei god oppleving. Dei tok oss i første omgang og gav bort initiativet. Vi var gode etter pause, men det heldt ikkje, sa Ødegaard til TV 2.
Det blei 2–0 til Athletic i ein kamp der det var VAR som skapte drama både før og etter pause. Sociedad kom dårleg ut av alle tre VAR-avgjerdene.
- Først dømde dommarane straffe for Sociedad på ei felling, som VAR slo fast skjedde utanfor streken.
- Ødegaard tok det påfølgjande frisparket. Ballen gjekk i muren og Ødegaard ville ha hands. Det sa VAR nei til.
- Og då Sociedad trudde dei hadde redusert og dommaren først dømde mål, greip VAR inn igjen og såg ein hårfin offside.
Totalt blei det lagt til 13 minutt i dei to omgangane, nesten alt på grunn av VAR.
Det var ikkje Ødegaards kveld, sjølv om han var involvert i mykje i andre omgang, der Sociedad hadde ballen mest.
– VAR er ikkje min beste venn. Det tar på å stå og vente så lenge, så dette styrka ikkje mi tru på VAR.
– Den mest aktive på Sociedad
I kampens aller siste sekund kunne og burde Ødegaard sett inn trøystemålet. Han kom heilt åleine med keeper, som fekk ei hand på ballen.
– Det var trist at den ikkje gjekk inn, men det var ikkje mykje saft igjen i beina, sa ein skuffa Ødegaard.
– Martin har ikkje fått til stort, men det har ikkje resten av laget hans heller, sa landslagssjef Lars Lagerbäck i TV 2 i pausen.
Han skal møte Ødegaard måndag, når landslagstroppen samlast til EM-kvalifiseringskampane mot Malta og Sverige.
– Men han jobba hardt og viste leiareigenskaper. Han var den mest aktive av Sociedad-spelarane. Han prøvde heile tida, og gjorde ein godkjend innsats i andre omgang. Han har ein fantastisk motor, sa landslagssjefen.
Sociedad blei totalt overkøyrt av rivalen før pause. Dei hadde null avslutningar i dei første 45 minutta, og låg under med 2–0. Inaki Williams var mannen bak det første, han hadde lett jobb med å sette inn innlegget frå Ander Capa.
2–0 var eit kunstverk som Raul Garcia lobba inn frå nesten 20 meter via keepers fingrar og stolpen.
Etter pausen tok Sociedad langt meir kontroll over spelet, og trudde altså dei hadde redusert ved innbytar Alexander Isak. Men det var før VAR såg på saka. Og Athletic hadde stort sett kontroll på det meste.
– Du merka at det er ein spesielll kamp. Det har vore ekstra god stemning på byen, og du merkar at dette er ein kamp som betyr mykje for fansen, sa Ødegaard om derbyet.
– Det var synd vi ikkje vann. Vi skal ta dei i heimekampen i staden.
