Lægreid irritert av svensk profil: – Trudde han var ein bra kar

– Han skulle i alle fall ikkje hjelpe Noreg, så då måtte eg berre bite tennene saman og gå føre i front. Det vart som det vart, fortel ein skuffa Lægreid til NRK.

På TV-bileta øvst i saka ser ein tydeleg ein konfrontasjon mellom Lægreid og Ponsiluoma.

– Trudde han var ein bra kar

Lægreid stoppa opp og ville at svensken skulle ta ei føring, men svensken nekta og Lægreid slo oppgitt ut med armane.

– Sa han at han ikkje skulle hjelpe ein nordmann?

– Ja, han sa det. «Eg skal ikkje hjelpe ein nordmann eg». Det var taktikken frå svenskane i dag, fortel Lægreid framleis smått oppgitt.

– Eg vart vel litt frustrert. Kanskje eg hadde med meg det på skytinga, seier Lægreid

Han skaut éin bom på neste skyting etter situasjonen.

– Eg er litt overraska, eg trudde han var ein bra kar, men «Ponsi» viste seg frå ei anna side i dag, seier Lægreid ifølgje Expressen.

Tarjei Bø er ikkje overraska over det taktiske spelet til svensk.

– Ja, dei må jo ta grepa sine for å slå oss, og vi gjer jo alle det vi kan for å halde på essa våre så lenge vi kan. Svenskane løyste det veldig bra. Det er eit veldig taktisk sterkt lag, seier Bø til NRK.

– Veit ikkje kva han tenkte på

Ponsiluoma hevdar det ikkje låg ein taktikk bak valet.

– Nei, det hadde vi ikkje. Men eg tenkte eg skulle gå så roleg som mogleg og spare energi til slutt, så det hadde ikkje spelt noka rolle kven som leidde ut, eg hadde ikkje hjelpt til, seier den svenske sølvvinnaren.

– Kva sa du til Sturla?

– Eg sa at han får dra, eg ligg bak og sparer meg. Han er regjerande meister og norsk, og då får han ta ansvaret.

Då situasjonen oppstod gjekk Lægreid og Ponsiluoma i tet saman med franske Fabien Claude, og nordmannen ønska at dei samarbeidde for å halde mellom anna Johannes Thingnes Bø og Sebastian Samuelsson bak seg.

Då svensken nekta å bidra, klarte trioen heller ikkje å halde unna for konkurrentane bakfrå og mista forspranget inn på den andre liggjande skytinga.

– Eg veit ikkje kva han tenkte på. Hadde han kanskje hjelpt meg litt så hadde han kanskje hatt det vesle forspranget han trengde på Sebbe, men eg trur Sverige er fornøgde i dag. Eg trur Ponsi også er fornøgd med sølv, sjølv om han er bak Sebbe, seier Lægreid.

Han er sikker på at det norske laget hadde tenkt annleis og hjelpt til med å halde oppe luka.

– Vi har jo ei bra lagånd, så viss eg hadde gått der med Johannes til dømes, hadde han hjelpt meg og drege meg på runden, men Ponsiluoma tenkte heilt annleis. Det er nokre utøvarar som tenkjer at vi må hjelpe kvarandre når vi leier og så er det andre som tenkjer dei skal gjere minst mogleg, seier Lægreid.

– Kanskje vi burde gått meir lagtaktisk

Likevel innrømmer han at den taktikken viste seg å vere best for svenskane som tok både gull og sølv med Sebastian Samuelsson og nemnde Ponsiluoma.

– Dei hadde vel lagt ein god taktikk før dagen i dag. Vi andre var kanskje meir individualistar. Kanskje vi burde gått meir lagtaktisk, seier Lægreid.

– Tek de sjølvkritikk på det?

– Nei, altså vi har jo tjue prosent av startfeltet i dag, så skulle vi gått lagtaktisk hadde vi vel dominert på alle rundane, svarer Lægreid med eit lurt smil.

Heller ikkje Bø trur det var taktikken som vippa sigeren i svensk favør.

– Nei, det trur eg ikkje. Han skyt 20 treff han som vinn. Viss du ikkje klarer det når du skyt 20 i dei forholda her, då trur eg du verken er norsk eller svensk, for då hadde du ikkje komme med på laget, smiler Bø.

Vetle Sjåstad Christiansen meiner svenskane har ein stor fordel på dei norske skiskyttarstjernene.

– Eg skal ikkje ta frå dei noko ære, men dei har litt meir tolmod enn oss til å kunne toppe forma. Hadde eg hatt sesongen til Sebastian hadde eg neppe vore på verdscuplaget eller her i VM. Dei er litt heldige som har eit omtrent spikra fast verdscuplag, som går uavhengig kor bra det går. Og ja, då kan dei få litt meir tid inn mot eit VM og ikkje kjenne så stort press på kvar verdscuprunde som kanskje vi har, avsluttar Sjåstad Christiansen.