Solskjær etter 4-0: – Dette er berre starten

MANCHESTER/OSLO (NRK): Manchester United knuste Chelsea 4-0, men Ole Gunnar Solskjær meiner laget har meir å gå på.

Manchester United

JUBEL: Det var feststemning blant United-spelarane på Old Trafford. Her blir debutant Daniel James gratulert med scoring

Foto: Jason Cairnduff / Reuters

Laster innhold, vennligst vent..

– Vi var gode i andre omgang. Då fekk vi ro med ballen, vi forsvarte oss godt, og fekk til kontringane. Men vi var heldige i første omgang, så ærlege må vi vere, seier Solskjær til TV 2.

– Måten måla kjem på, er vi nøgde med. Og vi held nullen. Harry var outstanding i begge boksar. Han har gjort akkurat det vi kjøpte han for, sa Solskjær til Sky Sports.

Han snakkar om forsvarskjempa Harry Maguire, som var innkjøpt like før overgangsvindauget stengde, og som berre har trene med laget fire-fem dagar.

– Gutane jobbar hardt, og dette er berre starten. No har vi masse sjølvtillit. Du kan ikkje drøyme om meir enn dette, seier Solskjær til BBC-programmet Match of the Day.

Det såg stygt ut i starten, men sesongpremieren enda i jubel og breie smil for Solskjær. Hans lag både scora fire gonger og heldt nullen mot Chelsea.

– Vi har mykje å forbetre enno. Men vi spela betre og betre utover i den andre omgangen.

– Skal gjere Old Trafford til eit fort igjen

– Det var ein kjempestart både for meg og for laget. Vi var nok litt heldige i første omgang, men i andre var vi klart best. Vi fortente sigeren, seier Maguire til Sky Sports.

I førre sesong heldt United nullen berre to gonger på heimebane. – Men no skal vi igjen gjere Old Trafford til eit fort igjen, seier han.

Lampard og Solskjær

GODE KOLLEGAER: Frank Lampard og Ole Gunnar Solskjær startar begge sesongen som managerar for lag der dei blei ikon i sine aktive dagar.

Foto: Phil Noble / Reuters

Chelsea starta med rutinerte Alonso, kante og Giroud på benken. Det reagerte tidlegare Chelsea- og United-manager José Mourinho på.

– Dei burde ha starta med meir rutine i ein kamp på Old Trafford, seier han.

Dei raude vann 4-0, den største ligasigeren heime på to år. Men det var det ikkje mykje som kunne tyde på etter første omgang. Visst leia United 1–0 ved pause, men det var på eit straffespark som kom totalt mot spelets gang etter eit drygt kvarter.

Kurt Zoumas klønete felling av Marcus Rashford var udiskutabel straffe, det slo VAR raskt fast. Rashford sjølv sette den knallhardt oppe i krysset.

Sterk Chelsea-opning

Til då hadde Chelsea eigd spelet, og Tammy Abraham trefte stolpen klokkereint før det var spela fire minutt. Like før pause gjorde Emerson det same. Marginane var heilt klart på Solskjærs side før pause.

– Dette var ikkje i nærleiken av nokon 4-0-kamp, sa Frank Lampard etter kampen.

Han måtte tole å sjå Chelseas største tap i sesongstarten nokosinne i klubbens 104 år lange ligahistorie.

– Vi kontrollerte første omgang og hadde to i stengene. Men vi gjorde fire tabbar som gav baklengsmål, seier Lampard, som må ta laget ein tur til Istanbul for å spele europeisk superfinale mot Liverpool onsdag.

United makta å ta kommandoen etter pause, og avgjorde kampen i løpet av 96 sekund midt i omgangen.

Først avslutta Anthony Martial ei kontring ved å setje innlegget frå Andreas Pereira i mål. Så viste Paul Pogba seg omsider fram med eit presis innlegg til Rashford, som blei tomålsscorar.

Debutant-scoring

Med 3–0 var løpet køyrt, og Chelsea-manager Frank Lampard mått berre innsjå at hans første konkurransekamp i den rolla gjekk mot ein fadese.

Ti minutt før full tid fekk også nyinnkjøpte Daniel James kome på scoringslista, etter berre åtte innbytar-minutt på bana. Han blei spela gjennom av Pogba og scora. Litt heldig, rett nok, ettersom ballen sneia ein Chelsea-spelar og sette keeper ut av spel. Men scoring i United-debuten var det uansett.

– Ole ba meg gjere meg klar for å kome innpå. Gå ut og ha det moro, sa han til meg, fortalde James.

– Eg har ikkje ord for korleis det er å kome innpå og score i debuten.

Solskjær var godt nøgd med debutanten.

– Det er hardt arbeid og dedikasjon. Han har fart, er dyktig, og har ein X-faktor. Han har hatt opp- og nedturar denne sommaren, men har jobba hardt. Eg er glad på hans vegne, seier Solskjær om James.

United har fri fram til bortekampen mot Wolverhampton neste måndag.

– Det er eit lag vi tapte mot to gonger på kort tid i vår. Den ser vi fram til, sa Solskjær.

Siste nytt

  • Utsetter El Clásico-oppgjøret

    El Clásico-oppgjøret mellom Barcelona og Real Madrid 26. oktober er utsatt på grunn av urolighetene i Barcelona, melder Sky Sports.

    FILE PHOTO: Joan Gamper Trophy - Barcelona v Arsenal
    Foto: Albert Gea / Reuters
  • Sølv til Sletsjøe i padle-VM

    Anna Margrete Sletsjøe tok fredag sølv i U23-VM i padling på distansen K1 maraton. Distansen gikk over 22 kilometer i Shaoxing i Kina. Sletsjøe tok igjen tetfeltet etter cirka fem kilometer etter en dårlig start.

    Anna Sletsjøe (nummer to fra venstre)
  • Rød forlenget med ett år

    Magnus Abelvik Rød har utvidet kontrakten med den tyske håndballklubben Flensburg-Handewitt.

    Nordmannen hadde en avtale som løp til sommeren 2022. Den er nå forlenget med ett år.

    VM håndball menn 2019, Norge - Egypt
    Foto: Lise Åserud / NTB scanpix

Sendeplan

Kl. Program Kanal