Med seg får Mollekleiv det yngste idrettsstyret i historia, dersom idrettstinget i mai vel dei nominerte medlemane.
Elisabeth Faret er innstilt som første visepresident, og Koss altså som andre.
– Eg er blitt spurt om å bidra med mi internasjonale erfaring gjennom arbeidet med Olympic Aid og kontakten min med dei internasjonale særforbunda, IOC, og ikkje minst Wada seier Koss til NRK.
God tid til ny OL-debatt
– Eg trur vi gjennom våre idrettsverdiar skal kunne påverke internasjonal idrett, ikkje minst ved å ta på oss internasjonale arrangement.
– Vinter-OL?
– Vi må først byggje ein felles plattform for norsk idrett før vi tek OL-debatten. Vi har nok litt tid på oss, fordi 2026 og truleg også 2030 er uaktuelle. Derfor kan vi bruke tid på å byggje opp til ein eventuell ny OL-søknad, seier Koss.
– Men eg har alltid vore positiv til at Norge bør søke om OL igjen.
PRESIDENTKANDIDAT: Sven Mollekleiv skal overta etter Tom Tvedt som idrettspresident, om valkomiteen får det som den vil
Foto: Vegard B. Lien / NRKSven Mollekleiv (64) har bakgrunn som informasjonssjef i NIF og marknadssjef i Norges Fotballforbund. Han sat også som ni år som president i Norges Røde Kors.
– Han er den mest samlande kandidaten for norsk idrett dei nærmaste åra. Det er hans leiareigenskapar som vi har lagt vekt på, seier valkomite-leiar Anne Irene Myhr til NRK.
– Vi har lagt vekt på at styret i større grad skal jobbe med idrettspolitikk, la Myhr til.
– Tvedt er ikkje samlande nok
Det var seks kandidatar til presidentvervet, inkludert sitjande president Tom Tvedt.
– Tvedt stiller til val for ein ny periode. Kvifor vil de ikkje ha han?
– Vi har lytta til signala frå medlemene, og Tom er for tida ikkje samlande nok for organisasjonen til å gå på ein ny periode. Det har vi fått klare tilbakemeldingar på, seier Myhr.
Forslaget inneber fem kvinner og seks menn. Om dei innstilte blir valde, blir det truleg det yngste styret nokosinne. Fire av dei foreslåtte er under 31 år.
Myhr opplyste at valkomiteen har hatt 13 heildagsmøte, og gjennomført 55 intervju med aktuelle kandidatar.
Vil ha tettare samarbeid med næringslivet
– Eg er veldig glad for den tilliten som ligg i å bli foreslått, seier Mollekleiv til NRK.
Han vil styrke ressursane for idretten, ikkje minst ved å invitere næringslivet til meir samarbeid.
– Eg har sett gjennom dei partnerskap som eg har vore med på tidlegare, at å invitere til bruk av kompetanse på område som organisering, bruk av teknologi og tilrettelegging av aktivitetar, kan vidareutviklast. Då kan vi skape verdiar ved å investere rett, seier Mollekleiv.
– Kva løn fortener du om du blir president?
– Det skal idrettstinget avgjere. Men eg er heilt sikker på at å bidra til å redusere løna på det nivået som har vore, er klokt. Det er viktig å fastsetje løna på eit nivå heile idretten seier er fornuftig og anstendig.
