– Høgda har ikkje vore min favoritt til no. Viss eg skal hevde meg i OL i 2026, så får eg byrje allereie no, seier Tandrevold til NRK.
Planen er nemleg å bli verande i alpane når skiskyttarsirkuset no tek ein velfortent pause.
Julefeiring heime i Noreg blir vraka til fordel for høgdetrening i Italia med sambuaren Trygve.
– For meg er det veldig viktig å få inn litt ekstra høgdetrening. Det er nokon som tek høgda veldig lett, og så er det nokon som ikkje tek høgda like lett. Eg er nok blant dei, fortel Tandrevold.
Ho har imponert med tre pallplassar så langt denne sesongen.
Framleis ligg kollapsen under jaktstarten i OL friskt i minnet. Det store høgdepunktet i fjor i Beijing gjekk føre seg på 1800 meters høgd og enda med legehjelp etter jaktstarten og eit tidleg fly tilbake til Noreg.
– Villige til å gjere litt ekstra
Italienske Anterselva, der dei neste vinterleikane tek plass, er på 1600 meters høgd, og derfor lagar ho sitt eige høgdeopplegg denne sesongen.
I tillegg til høgdeopphaldet i jula, tok Tandrevold ferien etter fjorårssesongen i høgda i Park City i Utah.
– Eg trur ikkje det er slik at ein aldri kan få det til, det handlar berre om å vere meir i høgda, trene meir i høgda og lære seg å kjenne sin eigen kropp. Det er det eg skal no, fortel ho.
26-åringen fortel at ho er fornøgd med høgdeplanen til landslaget, sjølv om både ho og lagvenninnene Karoline Knotten legg inn fleire høgdeopphald enn den eine høgdesamlinga til laget denne sesongen
– Handlar om det som går føre seg mellom øyra
At ho går meir sine eigne vegar, er berre eitt døme på «den nye Tandrevold».
Den tunge opplevinga i OL, saman med koronasituasjonen gjorde at gleda med skiskyting forsvann for Fossum-løparen i fjor.
– Det er jo ikkje sånn at alle når måla sine, det er jo umogleg. Det er gjerne tre på pallen og 97 skuffa utøvarar. Det fekk meg til å innsjå at eg må tore å nyte vegen mot målet meir enn eg har gjort, fortel Tandrevold.
Ho er heilt open om at for hennar del så har slaget stått «mellom øyra», og gjerne har sprinten der den ståande skytinga er avgjerande, øydelagt mykje.
Derfor har nettopp det å tole den mentale belastninga på sprint og ståande skyting, hatt eit ekstra fokus denne sommaren.
– Eg har prøvd å gå inn i mitt eige hovud. For min del handlar det om det som går føre seg mellom øyra, fortel Tandrevold.
No har ho jobba ekstra med sine eigne tankar før sesongen.
– Viss eg sjølv ikkje trur på det – så er det openbert at det ikkje kjem til å gå. Det handlar om å ta med seg det gode ein får til òg, ikkje berre straffe seg sjølv for det ein ikkje får til, seier ho.
– Ho har vakse
Patrick Oberegger har i ei årrekkje følgd Tandrevold tett, og meiner han no ser ei klar forandring.
– Ingrid har vorte flink. Ho har vakse det siste året med opplevinga i OL. Ho har vorte veldig flink til å snu dei dårlege dagane på ein positiv måte, og ikkje sjå så mørkt på ting, seier Oberegger.
Nettopp det meiner han at kan ha påverka Tandrevold under konkurransar.
Han peikar på at ho er ein ganske ekstrovert type.
– Å få ut det vi ser på trening i konkurransar er ikkje alltid så lett, spesielt i skiskyting der det ikkje berre handlar om det fysiske, men det mentale. Men der har ho vorte veldig flink, meiner landslagstrenaren.
Sjølv lovar Tandrevold å nyte meir framover.
– Den nye filosofien min er å kose meg meir. Ha det meir gøy, nyte reisa meir på vegen, seier ho til NRK.