– For å vere heilt ærleg anar eg ikkje kvifor eg er her. Eg er ikkje lenger England-manager, men reknar med at det er for å ta i mot meir kritikk etter kampen i går.
Slik opna tidlegare England-manager pressekonferansen i regi av FA i ettermiddag. Etter at Island slo England 2-1, og sende dei på hovudet ut av EM, har den engelske pressa latt både Hodgson og spelarane gjennomgå.
– Eg prøver fortsatt å komme meg etter tapet. Det var ikkje ei god natt. Eg er sårbar i dag.
Hodgson varsla allereie på pressekonferansen etter kampen at han ville gå av, og var tydeleg misfornøgd med å måtte stille opp på nok eit pressemøte i dag.
Sjå heile pressekonferansa nederst i saka.
– Alt eg seier gir bensin på bålet
Hodgson utdjupa etter kvart kvifor han var skeptisk til å stille på dagens pressekonferanse.
– Alt eg seier vil gje bensin på bålet, men eg kjem hit for å ønske min arvtakar lykke til.
Hodgson avkrefta at det var nokon som tvinga han til å stille i dag.
– Eg kom hit av eigen vilje, ingen tvinga meg til å vere her. Eg stilte opp fordi de skal vite at eg aldri spring vekk frå nokon, og ikkje er redd for å vere her.
Trass i det massive medietrøkket etter tapet i går, ville Hodgson takke den engelske pressa for behandlingen gjennom dei fire åra som England-manager
– De er ikkje alltid dei greiaste å ha med å gjere, men de har alltid vore rettferdige med meg.
Leitar etter arvtakar
Med seg på pressekonferansen hadde han Martin Glenn, CEO i FA. Han kunne bekrefte at dei allereie leita etter ny manager, under 24 timar etter EM-exiten.
– Me ser etter den beste personen for jobben. Eg kjem ikkje til å nemne namn i dag, men kan sei at jakta allereie er starta.
Han meiner at det viktigaste no er å gjenreise England som fotballstorheit.
– England er som ein krøpling akkurat no, og me må finne ut kvifor. Me må finne ei ny leiing som kan hjelpe oss opp igjen.