NRK Meny
Normal

Hermans vann thrilleravslutninga - Kristoff mista leiartrøya

Den knallharde avslutninga opp til Målselv fjellandsby blei for tøff for Alexander Kristoff og resten av dei norske. Belgiske Ben Hermans vann kongeetappen i årets Arctic Race of Norway.

Hermans i ARctic

ETAPPEVINNAR: Ben Hermans avslutta sterkast opp til Målselv fjellandsby og vann den tredje etappen.

Foto: Grøtt, Vegard Wivestad / NTB scanpix

Ein beinhard avslutning opp til Målselv fjellandsby skilde dei beste frå nest dei beste i dagens kongeetappe av Arctic Race of Norway. Ikkje uventa blei etappen for tøff for samanlagtleiar Alexander Kristoff.

Kristoff stivna fort

– Eg hadde planer om å prøve, men det heldt berre halvvegs i bakken. Eg stivna ganske fort, sa Kristoff til NRK etter målgang.

Tredje etappe Kristoff

LANGT BAK: Alexander Kristoff trilla inn to minutt bak teten og mista ikkje overraskande leiartrøya.

Foto: Grøtt, Vegard Wivestad / NTB scanpix

For med litt over ein kilometer igjen til mål gira estiske Rein Taaramäe opp eit par hakk og plutseleg var Astana-ryttaren heilt aleine opp dei bratte stigningane med Tour de France- tendensar frå publikum i vegkanten.

Men sluttspurten sette han tydelegvis inn for tidleg. BMC-ryttar Ben Hermans kom sterkt bakfrå og tok igjen ein svært sliten Taaramaë og vinn etappen.

Han tek også over den blå leiartrøya i Arctic Race.

Mathias Franck kjem inn som tredjemann og Edvald Boasson Hagen er den av dei norske som heng best med. Han kjem inn på ein åttande plass, 23 sekund bak.

Boasson Hagen best i samandraget

Boasson Hagen hang seg ikkje med på rykkinga frå teten i starten av bakken og sjølv om det ikkje blei suksess, trur han det var ein lur taktikk.

– For min del må eg berre køyre jevnt. Eg hadde tapt meir viss eg hadde blitt med på rykk og napp, sa Boasson Hagen til TV2 etter og held fram.

– Det blei for tøft. Eg kjempa heilt til siste meter men det heldt ikkje heilt inn, sa Boasson Hagen som no er vårt største håp i rittet som avsluttast i morgon.

Han er nummer tre totalt, 24 sekund bak leiaren Ben Hermans før avslutninga av rittet i Narvik i morgon.

Boasson

MED I SAMANDRAGET: Edvald Boasson Hagen er nummer tre i samandraget etter dagens åttandeplass. Han er 24 sekund bak Ben Hermans.

Foto: Grøtt, Vegard Wivestad / NTB scanpix

Som forventa mista altså Alexander Kristoff den blå leiartrøya etter at han trilla inn over to minutt etter vinnar Hermans. Men likevel kunne vår store stjerne seie seg fornøgd med den solfylte dagen i Troms.

– I dag fekk me faktisk tid til å nyte naturen. Me fekk sjå mange fine fjordar og fjell og til og med dansa litt, fortalde Kristoff.

Han og resten av feltet blei nemleg stoppa etter starten i Finnsnes av ei folkedraktlenke på Gisundbrua.

– Eg var ikkje heilt førebudd på det, men det var morsomt det. Mangla musikk då, seier Kristoff med eit smil til NRK.

Sjå videoklippet frå Troms Folkeblad under.

Kristoff svinger seg før kongeetappen

Video frå Troms Folkeblad

Siste nytt

Sendeplan

Kl. Program Kanal